吳鎮宇同吳卓羲承接上集，今集繼續做兄弟，因此有唔少對手戲。事隔10年，上集唱K先啱啱出道，但今時今日唱K都已經做咗TVB當家小生，估唔到都仲要俾鎮宇大叔喝，都咪話唔瘀呀！不過唱K一向都好識做人，當然虛心受教，唔會對鎮宇嘴藐藐啦！
等咗10年，FBI終於等到《衝上雲霄》續集《衝上雲霄II》上畫。今集雖然冇咗馬德鐘，亦冇咗FBI細時嘅女神陳慧珊，好彩TVB最後出銀彈氹掂「Sam哥」吳鎮宇同張智霖助陣，仲有FBI嘅另一女神陳法拉呀，點都唔會差得去邊啩？
《衝上雲霄II》啱啱播，呢排個個都啄住失婚法拉，話佢因為唔同TVB續約所以面都唔使畀，唔做宣傳唔谷劇，淨係顧住喺美國進修避世，不過查實套劇拍咗成半年，是非又點會得法拉至有?FBI就聽聞一向火爆嘅吳鎮宇喺拍《衝上雲霄II》嗰陣，成日睇唔過眼飾演佢細佬、又係機師嘅吳卓羲唔背熟對白就同佢排戲，所以試過向唱K用鄉下話大叫：「返來囉、返來囉！」！暗寸唱K成日遊魂。
之不過一山還有一山高，鎮宇未算最火爆，出名好好先生嘅Chilam（張智霖）原來最難頂。話說佢除咗上年喺微博大鬧《衝上雲霄II》班助導（PA）亂發通告外，有劇組二五仲同FBI講，其實差不多全部幕後都俾Chilam鬧勻，甚至去到巴黎拍外景，Chilam都唔放過，繼續鬧。其實不如續集改名叫《火爆雲霄》可能仲貼切喎！
躁底Chilam喺今集做靚仔風流機師，仲會床戰6個索女。呢一幕就講佢同法拉由屋企門口咀到上床，最後係咪撻喺床傾吓偈咁單純先？
《衝Ⅱ》喺星期日舉行宣傳活動，冇法拉冇Chilam，擔大旗嘅吳鎮宇（右一）喺祝酒嗰陣竟然掛住講手機，之後仲索性離隊行埋一邊傾，認真巴閉。
杏兒爆喊
Sam哥老婆Zoe（胡杏兒飾）喺第2集就病死咗，之後Sam哥喺飛行學校遇到同亡妻一模一樣樣嘅夏晨（都係胡杏兒飾，真係做戲咁做！）。呢一幕講飛行學校授課完畢，夏晨問Sam哥係咪有嘢想同佢講，結果Sam哥拋出一句：「對唔住！」話說當時杏兒其實唔需要喊，但當鎮宇講完呢一句，佢就忍唔住爆喊。
食埋阿嫂
今集吳卓羲已經榮升高級副機長，竟然對同佢阿嫂一模一樣樣嘅飛機維修督導員胡杏兒起痰，好離譜喎！
有性冇愛
上集都有份嘅馬國明今集亦係升咗做高級副機長，仲同飾演高級機艙事務長（senior flight purser）嘅江美儀展開一段有性冇愛嘅關係，不過以TVB劇集作風嚟講，當然最後兩個真係撻着咗啦！
阮小儀串爆
上集有唱主題曲嘅Eason做串星，今集就有唔喇更嘅阮小儀、陳敏之同蔡一智等等，認真離奇。
