作戰搵錢 求愛男好路數 月球面Rocky執樣做代言 陳定邦搞掂高版周迅無綫話題節目《求愛大作戰》即使已告一段落，但「綠魔」Karl接騷接唔停外，一班「求愛」男都有斬獲，Cyrus被整容上癮的Queenie箍實；去年跟未婚妻戴夢夢分手的導師陳定邦亦有着落，溝掂黃宗澤緋聞女友高版周迅倪晨曦；而曾捲入強姦案的月球面Rocky，更被美容院睇中，磨面改鼻執樣，收錢做代言人。
保住成龍鼻有危有機！有美容院貪月球面Rocky夠「岩巉」，決定用他做生招牌。早個禮拜五（七月五日）晚Rocky拖埋朋友壯膽，到銅鑼灣的美容院見老闆，傾了大約一句鐘再見埋醫生，一行才到附近食肆醫肚。
「Rocky塊面有好多凹凹凸凸嘅窿，美容院老闆就係睇中佢皮膚夠差，幫佢磨番滑做樣板，仲話Rocky個成龍鼻太大唔合比例，提意佢收窄埋，不過Rocky就心大心細，佢鍾意大鼻，而家仲考慮緊。」知情者說。
月球面未變滑，但擁有筋肉人身材的Rocky早已求愛成功，追掂今屆港姐面試時被熱捧，最後卻無入圍的Colour，二人撻着無耐，Rocky已介紹女友給一班求愛男認識，急於晒命！
Rocky喺一眾求愛男入面出名衰樣，反而被美容院睇中搵佢合作，幫佢整走面上火山口。
單睇筋肉人身形，Rocky都叫見得下人，但佢嘅招牌又扁又大嘅鼻同一面火山洞的確趕客。
Rocky雖然其貌不揚，但追女一樣冇難度，溝掂今屆面試港姐大熱之一但無入圍嘅Colour。
壹醫學美容打鐵趁熱，即時睇中求愛真人騷入面爛面Rocky做代言。
搞掂冠軍華姐至於愛情導師陳定邦更大躍進！上過美國節目《The America's Next Top Model》算命，講得一口流利英語的他，獲邀到美國康州賭場做「棟篤笑」搵真銀。事業運強，去年未婚妻戴夢夢被踢爆偷食，甩拖一段時間的他近日跟○五年多倫多華裔小姐冠軍、黃宗澤緋聞女友的倪晨曦（Elva）行埋。
二人早前被發現在尖沙咀連卡佛拍拖shopping，之後在附近食肆開餐，但全程笑多過食，在餐廳磨了兩粒鐘才埋單走人。
「佢哋其實識咗好多年，不過當時阿邦有另一半，兩個人冇來往，近排再喺party見番，之後求愛搞活動，阿邦好多時都會叫埋Elva出席，就咁搞掂！」知情者說。
陳定邦日前同倪晨曦拍拖到尖沙咀連卡佛睇鞋，然後兩個人到附近餐廳撐枱腳。
倪晨曦曾是05年多倫多華裔小姐冠軍，難怪咁多仔黐埋身。
愛情導師陳定邦亦唔執輸，溝掂同黃宗澤傳過緋聞嘅倪晨曦。
有下文《求愛》雖被指造假，收視同反應均遠不及上一輯《盛女愛作戰》，但真人騷男女夠騎呢，機會仍陸續有來。
綠魔出寫真
曾經做過娛圈人助手多年的綠魔，騎呢出晒位，不單頻頻出活動賺錢，還掉轉有助手、髮型師跟身，稍後更會出寫真集及有戲拍。
蟻哥Sharon有聲出
樣貌被指似動畫蟻哥、寸嘴鬧人唔使本的Sharon，憑住一張利嘴，被邀做網上電台節目嘉賓，繼續靠把聲。
Cyrus搞網
食住《求愛》條水，連導師都溝埋的Cyrus跟Rocky聯手搞宅男「ｗe can do it.com」網站幫一班宅男搵食。
Queenie開班
整容整上癮的導師Queenie，在美麗華商場開班，教人做DIY禮物送俾情人。
