吳鎮宇chok爆燈重頭劇《衝上雲霄II》終於出街，收視許勝不許敗，無綫响開播前連續搞咗兩次晒冷宣傳谷劇，首先係上個禮拜四（七月十一日），全人類著上整齊航空制服，响飛機維修庫開記者會，跟住星期日（十四日），男嘅西裝，女嘅低胸盛裝亮相，响酒店舉行酒會。
一向比林峯更加chok嘅吳鎮宇，戴黑超扮飛機師駕輕就熟，反而除低副超著套老西出席酒會，視線無遮無擋下，竟然一腳就踩爆紅地氈旁邊盞燈。代唔代表收視爆燈都係其次，重點係衰咗嘅吳鎮宇，繼續氣定神閒chok住影相。
堅持chok到底，同記者一邊食嘢一邊傾偈，都要用手掩住個嘴，儀態好過香港小姐。至於對收視有咩期望，當日塊面搽咗成吋厚粉嘅鎮宇，就講到好冇所謂：「今次係最後一次宣傳，我要返大陸拍戲，如果結局收視好，有面嘅咪返嚟囉！」
據聞《衝II》以大量床戲嘴戲甚至野戰做賣點，以上情節，以前都算係無綫嘅武器，但今時今日，睇怕要視乎班演員嘅運氣啦！
祝酒期間，吳鎮宇部電話係咁響，佢照樣chok住祝酒，之後同記者傾偈，放嘢食入口都不忘用手遮住，儀態型chok兼備。
出場就踩爆燈嘅吳鎮宇，解釋話因為現場太多靚女，一時分神喎！
飛機師look，張智霖冇咗副超，輸晒！
吳卓羲真係好怕有緋聞，同傅嘉莉影張相都要保持距離，張馨予對佢真係好大陰影！
眾花旦小花奉命性感亮相，胡定欣低胸再踎低，偏偏胡杏兒著件包上頸乾濕褸，攞嚟輸！
