唯唯豐胸挑戰大波謙無綫新劇《飛虎II》上個禮拜二（七月九日）响屯門拍外景，烈日當空拍特訓場面，唔好話在場記者企唔夠半個鐘已經身水身汗，埋位扮受特訓班假飛虎，更加唔好受；好在兩位主角羅仲謙、梁烈唯已經升咗呢，唔使好似上一集咁要上山下海，齋企騷肌就搞掂。
出晒名叫「大波謙」嘅羅仲謙，著住貼身tee，心口同身形都縮晒水，反而企响旁邊嘅唯唯就算身形唔及謙謙壯闊，但一對若隱若現嘅胸肌，明顯大過謙謙。
唯唯落力豐胸，但「大波謙」就潑晒冷水：「而家唔興大隻，興玩線條，總之（除衫）唔會令大家失望。」
至於「大波唯」就預告同謙謙有場出浴戲：「我下腹未操得好好，到時可能要包高啲條毛巾遮一遮。」講多無謂，想收視好過上一集，班肌佬除衫，避無可避！
「大波謙」忽然平胸，唯唯望落有料到得多！馬德鐘惡招特訓飛虎學員，地下堆牛屎其實係紅毛泥，不過放响港男出身嘅李晉強背脊個沙包就係真，重到腳都曲埋。
劇情安排飛虎隊員响啲假牛屎面前做掌上壓，高鈞賢少爺仔上身，對住鏡頭七情上面，事後要工作人員埋嚟幫佢抹汗。
大熱天時，外景組預備冰塊俾演員降溫，黃智雯仲主動幫馬德鐘冰敷頸、手。
