憑搞笑形象上位嘅金剛，雖然冇玉樹臨風外形，但勝在有把啷過油嘅口，難怪緋聞咁旺盛。佢同台灣索女Miya分手後、火速搭上辣妹Ashlee，之後又再同港姐冠軍張嘉兒、蔡慧欣、Mandy Lieu甚至阮小儀傳緋聞。
陳蕊蕊身材火辣，獲金剛大讚係一個單純女仔，佢哋𠵱家係好朋友關係。
「Missing U」
不過噚日有讀者報料，話金剛最近力媾天使陳蕊蕊，佢哋仲喺Instagram傳情，陳蕊蕊喺演出之前，金剛會為佢打氣，留言大讚：「U r the best！」之後蕊蕊貼圖話病住排舞，金剛好快又留言話：「不給你讚，因為我心疼。」佢哋仲互相留言話：「Missing U」。金剛不嬲鍾情有身材嘅辣妹，睇蕊蕊條件，似乎啱曬金剛口味，馮仁昭噚日打畀金剛，問佢係咪同陳蕊蕊拍拖？佢話：「我哋不嬲識，大家係好朋友。」再問蕊蕊係咪佢杯茶？金剛笑得好甜話：「都OK㗎！我覺得佢性格好好，係一個好單純嘅女仔，將來嘅嘢好多嘢都唔知，總之我哋係好好朋友。」
金剛雖然冇玉樹臨風外形，但有把啷過油嘅口，所以好受女生歡迎。有讀者報料話金剛同陳蕊蕊喺Instagram傳情。
from:
http://hk.apple.nextmedia.com/entertainment/art/20130711/18330003
