無線新劇《好心作怪》聽晚播大結局，收視越嚟越好，週一、二嘅收視平均有30點（約193萬觀眾），最高32點（約205萬觀眾），最高收視嘅係周麗淇（Niki）怒摑黃宗澤（Bosco）嗰一場戲，噚日無線臨時喺電視城搞咗個小型祝捷會。
之前宣傳時，Niki同Bosco曾經應承過平均30點收視就著泳衣、泳褲，但噚日兩個都冇兌現，Bosco即刻解釋：「我下晝至收到通知，都要修剪嚇啲草皮，冇理由咁影響市容㗎！」而Niki直頭反口話冇應承過，仲話唔知點解只係要佢兩個著。
黃宗澤同周麗淇最後都反口，披泳衣、泳褲上身就當著咗嚟慶功。黃宗澤同袁偉豪戴罩後，不期然令人有衝動……走埋去打佢哋。
披上身當著咗
最抵死係無線都冇理佢哋感受，一早安排咗泳衣、泳褲喺度，結果Bosco同袁偉豪將三點式泳衣上截披上身，而Niki就同萬綺雯（蚊蚊）攞泳褲擺喺重要部位前影相當著咗。之後Bosco就答應如果最後有35點收視，佢慶功時著泳褲都冇所謂，但Niki就拉埋蚊蚊落水，話佢著蚊蚊都要著，點知蚊蚊好大方話佢遲嚇去旅行，會放泳衣照上微博，Niki問係咪三點式，蚊蚊好型咁話：「我從來冇著過一件頭！」搞到反口縮沙嘅Niki惟有話如佢唔喺香港，都會整兩件頭泳裝照出嚟。
露咗少少事業線嘅Niki再次應承35點會著泳衣，聽住先啦！劇集收得，（左起）萬綺雯、黃宗澤、周麗淇同袁偉豪笑到四萬咁口。
from:
http://hk.apple.nextmedia.com/entertainment/art/20130711/18329902
