前晚唐貝詩舉行派對慶祝25歲生日，近年專心工作的她前晚來個大解放，以中門大開款連身裙上陣大騷驕人上圍，單身年多的她自言不心急拍拖，並希望不要遇著爛桃花。
平日收起性感的唐貝詩，派對上大開中門，令人眼前一亮。莊思敏（右）偕妹思明出席派對。
今日是寇鴻萍女兒唐貝詩（Lydia）的25歲生日，前晚她舉行生日派對邀請近百位好友慶祝，除了寇鴻萍與老公梁廷鏘外，出席賓客包括莊思敏與胞妹莊思明、莊思敏的兩位緋聞男友王大業及林忠豪、《求愛大作戰》的形象指導「綠魔」Karl等，場面熱鬧。
Lydia身穿黑色中空大露背連身裙到場，性感爆燈，問她會否怕母親詐型？她坦言：「媽咪仲未見到我咁著。（你大個女所以咁性感？）因為平時返工著得比較密實，今次可以名正言順打扮得靚啲同性感啲。」談到生日願望，她希望事業有成及身體健康，至於感情方面，現時單身的她說：「都希望拍拖，但唔急，總之唔要爛桃花。（你有好多爛桃花？）唔係，我依家好專心工作，唔想自己情緒太大波動。」
林忠豪直言恨結婚，但仲未求婚。寇鴻萍（左）偕夫婿梁廷鏘賀女兒Lydia生日。
莊思敏生意做賀禮
莊思敏稱未有預備禮物給壽星女，她笑言：「佢乜都有，唔需要實物，我間時裝店同化妝學校想同佢間公司合作，送啲生意畀佢做禮物，長遠啲，佢仲開心。」
「皮草太子爺」王大業表示有留意舊愛賭王千金何超雲被偷拍泳衣照，問他有否致電安慰對方？他直言：「冇，都唔係好負面。（佢身材好唔好？）唔評論女仔嘅身材，好尷尬。（仲有冇聯絡？）少。（會唔會提點佢唔好著泳衣？）唔會，游水梗係著泳衣，唔通著潛水衣，希望記者畀啲私人空間佢。」
另外，林忠豪匆匆放下禮物便離開，有傳他快將結婚，他承認說：「盡快啦！我年紀都唔細，但仲未求婚。（女友係高官個女？）係普通人。（佢好靚女？）唔係，一般。不過我情人眼裡出西施，你問我實話靚。」至於有否慰問早前被網友「潤」的前女友廖碧兒，他表示：「冇聯絡。佢有經驗，我唔使擔心。」
from:
http://orientaldaily.on.cc/cnt/e ...0710/00282_070.html
