張家輝自從月前張fit爆筋肉佬相曝光後，即人氣勁升，連運都好旺！上星期張家輝喺上海國際電影節憑《激戰》攞咗影帝，睇嚟獎項仲陸續有嚟。
呢頭攞完獎，家輝即刻撲去馬來西亞開工，事關佢處男自導自演嘅新戲《盂蘭神功》正火熱開工中，FBI八到佢為咗要專心拍好呢部戲，連彭浩翔套新片《香港仔》都推咗，結果由曾志偉頂上，同千嬅做兩公婆。
講番套鬼片《盂蘭》，原來曾經講過要拍一套最恐怖本地鬼片嘅家輝，今次以盂蘭節為故事背景，當然唔使操8嚿腹肌啦，戲中講家輝嘅老豆忽然患重病，家輝被迫要接管老豆嘅神功戲班，之後仲發生一連串怪事。而女主角劉心悠會一人分飾兩角，FBI仲聽聞家輝會同心悠BB有場超激床戲添！不過講到激，FBI覺得戲中吳家麗竟然做咗家輝老母，仲夠奇情，家麗姐只係老家輝4年咋，就要做佢阿媽喇！冇計！鬼叫45歲家輝操到咁鬼fit咩！
張影帝自導自演，仲咁蹺編到自己同心悠上演一場佢從影以來最激床戲，擺明益番自己唔益人喎。
曾經係一代艷星嘅吳家麗為家輝復出，不過雙腳擘開嘅坐姿，真係好耐冇見！
49歲嘅吳家麗點樣飾演45歲張家輝嘅阿媽？FBI都好想知。
心悠BB索爆就唔使多講，但FBI聽聞劇組其實大部分都好冧吳家麗姐姐，話佢keep得好之餘又成日同劇組有傾有講，好nice咁話。
心悠勁專業，一有時間就跟神功戲花旦學藝。
