近日脫罩嘅龍小菌同無綫節目《求愛大作戰》嘅「綠魔」Karl，同樣人氣急升，龍小菌噚日約綠魔去中環血拼買新衫，綠魔花咗約粒半鐘，為龍小菌打造清純、成熟同活潑三個look，龍小菌每換一套衫都喺鏡前猛咁照，鬼咁貪靚。
綠魔Karl噚日變身「橙怪」，佢竟然將龍小菌倒模到同自己一樣，好有姊妹feel。龍小菌着住短褲晒長腿，大賣青春活潑。
《求愛》有機添食
瘦身成功嘅龍小菌，仍嫌未夠弗，揀衫時堅持唔着背心，怕麒麟臂嚇死人，所以要求綠魔為佢配外套，龍小菌搞笑話：「我手臂打死人。」佢哋喺衫架前有商有量，龍小菌先換上蝦肉色連身衫配橙色外套，打扮成熟添女人味，仲同綠魔襯到絕，跟住再換短褲晒長腿，配埋跳脫甫士，充滿少女味。最後龍小菌換上白色連身裙襯桃紅外套，大賣清純。問龍小菌打算花幾錢買衫？佢好坦白咁話：「𠵱家冇乜錢，希望多啲贊助，我最肯花錢係買蕉，熟我嘅朋友都知我成日帶梳蕉同大家分享。」
綠魔憑《求愛》彈出，呢個被指造假嘅真人騷喺上個禮拜五終於播完，節目上個禮拜平均收視21點，約135萬觀眾捧場。而通訊事務管理局辦公室發言人噚日話，成個禮拜收到六單投訴，投訴包括粗言穢語同不雅動作，無綫外事部就聲稱接到三個觀眾讚賞，期望開續集喎！
from:
http://hk.apple.nextmedia.com/entertainment/art/20130703/18320404
