無綫呢排兩套劇集《熟男有惑》同《好心作怪》收視都算唔錯，不過就猛俾人話有抄襲之嫌，所以黃子華返嚟幫無綫拍嘅新劇《My盛Lady》真係好令人期待。
日前子華同陳敏之、徐子珊去咗上環港外線碼頭拍攝一場強吻戲，劇情講子華想敏之認清楚佢鍾意嘅係邊個，惟有夾硬咀敏之令佢討厭自己。子華強吻前做足功夫，佢講笑話：「每次咀人前會食定香口膠，做呢行都有風險㗎！」但現場又唔見子華同敏之夾下個位，子華好自信咁話：「好浪漫先要㗎嘛，呢場唔使。」問佢最難忘同邊個咀？佢諗都唔使諗就話：「梗係嘟姐（鄭裕玲）啦！拍《男親女愛》時等咗一百集先有得咀，之後拍舞台劇咀足五十次。」
黃子華日前同陳敏之拍無綫劇《My盛Lady》，子華排都唔使排，一嚟就咀落去，搞到敏之措手不及。敏之俾子華咀完後，嬲到摑佢一大巴。
敏之拍完之後，即刻攞紙巾抹嘴。跌傷嘅徐子珊（左）着四吋高踭鞋開工，見到子華同敏之激吻即眼火爆。
徐子珊眼火爆
子華一埋位就嚟真一樣強吻敏之，敏之七情上面喊晒口，佢事後話：「拍咁耐戲又儲咗啲人生經驗，拍呢類咁激嘅戲唔可以NG太多次，如果唔係會唔自然。」而劇中鍾意子華嘅徐子珊就睇到眼火爆，早前佢着四吋高踭鞋拍劇跌傷，𠵱家頂硬上繼續着，佢話：「冇時間做物理治療，郁到個位都會痛，好多人都嚇我話將來有風濕好慘。」佢話仲有個幾星期就拍完，到時會做針灸整番好條腰。
from:
http://hk.apple.nextmedia.com/entertainment/art/20130702/18318846
