歌手陳柏宇（Jason）相隔一年再度出碟，首次參與新碟曲詞創作的他卻完全冇預女友份，更笑言絕不會作情歌冧女友。唔恨拎男歌手獎的他又指對獎項冇太大感覺，反而希望盡快舉行屬於自己的演唱會。
陳柏宇為新碟寫了五首歌，卻沒打算寫歌送給女友。
陳柏宇（Jason）與女友符曉薇（Leanne）自公開戀情後，感情穩定，甚少緋聞埋身，Jason指兩人最愛吵吵鬧鬧過日子：「都拍咗就嚟兩年，不過仲未過熱戀期o架！」今次是Jason第一次有份參與新碟創作，更一口氣連作五首歌，卻冇一首是送給女友的，他露出奸詐笑容說：「未想寫佢住喎！其實有諗過會寫咩畀佢，不過佢聽完一定唔冧，唔會寫到太肉麻，激吓佢先！不過未係時候去做呢件事，未有好大推動力，可能下一隻碟先啦！」
雖然如此，Jason坦言視Leanne為結婚對象：「結婚實有諗過，不過唔會係短期內嘅事，但係向緊嗰個方向嘅。心態我定咗落嚟喇，但真係未行到嗰步，事業同經濟都要考慮，我諗五、六年後啦！」
符曉薇與陳柏宇拍拖兩年，感情穩定。唱得的陳柏宇不強求獎項，反而期待開個唱。
唔恨爭獎
Jason一向賣靚聲，但入行六年卻未拎過任何男歌手獎，野心不算強的他淡然表示：「獎項虛榮嚟啫，冇唔代表唔夠成功。其實自己由細到大唔太注重獎項，而且呢啲睇緣分，冇一個定律，唔係你努力或者點樣就有o架嘛。坦白講入行到依家真係冇幻想過拎男歌手獎，好似拎咩獎都係差唔多感受咁！」
反而Jason對開演唱會抱有更大期望：「我有幻想我嘅個人演唱會會係點o架，一上到台嗰兩個鐘就係你嘅，你就係焦點。不過我目標未係紅館，我冇乜經驗，開個迷你concert，唱廿首歌適應下先。」
from:
http://orientaldaily.on.c ... /00282_043.html
