早排高海寧自爆成功減咗八磅，導致大騎樓變縮水樓，但高Ling講到明會繼續減，終極目標係減夠十三磅。女人永遠嫌自己未夠瘦，但八珍見到高Ling對髀，終於明白佢寧願縮胸，都堅持繼續減嘅原因。
上個禮拜六（六月二十二日），高Ling同兩個女仔friend行中環，白tee短褲襯波鞋，但呢身夏日look，完全俾佢一對充滿橙皮脂肪大髀破壞晒！瘦胸不瘦腿，根基厚高Ling就算減多五磅，都冇可能搣走對豬髀。
雖然未達標，起碼睇得出高Ling有下過苦功。相反，一日到黑都話減肥嘅苟芸慧，減到今時今日依然好肉地。
上個月尾，肥苟高調宣布搣甩九磅肥肉，但表面睇完全feel唔到，上個禮拜四晚（二十日）嘅《最受歡迎廣告頒獎典禮》，佢著上全黑膠衫扮貓女，望落依然係咁肥。記者問肥苟最新磅數，佢唔肯再講，只係話自己朝朝六點起身會响屋企拉筋做瑜伽，所以又瘦多幾磅。
拉筋會瘦，八珍第一次聽，但既然肥苟同城城一樣愛打邊爐，不如學埋郭天王，日日跑步吧啦！
薄tee熱褲露肚仔，高Ling打扮夠清涼，但一對橙皮粗腿，扣分！
唔係幻覺，高Ling身邊位肥妹朋友，條腿居然瘦過佢，真係唔減唔得！
行入Chanel，高Ling主力睇手袋，仲同朋友一齊研究size。
無論扮貓抑或著便裝，真係點都睇唔出肥苟瘦咗十幾磅囉！
