今個年尾上嘅3D電影《西遊記之大鬧天宮》，星期日（六月十六日）喺上海舉行記者會，三個主要男角周潤發（玉帝）、甄子丹（孫悟空）、郭富城（牛魔王），拍住三架由Harley Davidson特別打造嘅電單車一齊出場，人同車，身價加埋近億！擅於控制氣氛嘅發哥，全程捉住宇宙最強嚟玩，甚至直插要害，笑對方冇乜頭髮，又問佢前面啲頭髮係咪真？搞到好打子丹毫無還手之力。
其間，有現場記者問已婚發哥同子丹喺屋企邊個話事？發哥竟然答：「我同子丹唔係一齊住，佢老婆（汪詩詩）唔係我二奶，我老婆（發嫂）又唔係佢小三！」連兩位阿太都唔放過。
嚟緊九月威尼斯影展，《大鬧天宮》亦會組隊過去做宣傳，二五話發哥仲嗌今次喺上海只係留一晚，但一到就要搵地方食火鍋嘅郭富城，快啲上網摷定料，睇吓到時去邊度食火鍋，好在城城醒，話威尼斯冇唐人街，未必搵到火鍋店，不過，佢可以負責帶煲，再買埋急凍包裝嘅麻辣底，一定冇甩拖咁話。
發哥、子丹、城城，黑超look襯哈利電單車，鬥型鬥chok。
自稱唔gel頭後生啲嘅發哥，撥住頭髮問身邊甄子丹前面啲頭髮真定假？搞到對方完全唔識反應。
《大鬧》演員多到數唔晒，包括今次有嚟上海嘅張兆輝、張梓琳同何潤東。
幾個男人喺台上搞氣氛，坐喺台下，左起：丹嫂、發嫂、經理人小美、輝嫂，四個背後女人，動作一致，揸住手機，影相拍片。
記者會前一晚，《大鬧天宮》演員出席上海電影節開幕，壓軸行紅地氈。
紅地氈指定圖片：女星晒肉
魔鬼天使徐若瑄
林峯舊愛潘霜霜
劉愷威女友楊冪
