近排娛樂圈喜事連連，好似陳豪咁，結婚生仔一鋪過！而就嚟做10月新娘嘅李蕙敏，呢排唔單止為自己件婚紗絞盡腦汁畫設計圖，仲靜靜雞去睇中醫調理身體，養好啲卵子，希望為第日生B做好萬全準備。
講時講，情路兜轉多年嘅李蕙敏，真係忽然遇真愛，仲話會喺英國古堡行禮，浪漫到暈！而且講到明婚後不設防，同老公仔努力造人。不過43歲嘅佢，就算即刻生，都已經係高齡產婦，所以呢排密密去睇中醫用中藥同針灸保健，希望早啲開始調理身體，婚後一擊即中！李蕙敏仲同媽咪姐講：「我同未來老公都好鍾意小朋友㗎！依家去紅館開個唱同生B都係我最大嘅希望，如果好無奈真係生唔到，我哋都講定會去領養。身邊有朋友都咁樣做，係一件好平常亦好有愛心嘅事嚟。」事實上，李蕙敏細細個就被養父母領養，所以佢都絕唔介意做養母，延續呢份無私嘅愛心！
同外籍男友拍拖3年，終於修成正果，待嫁嘅李蕙敏，神采飛揚。媽咪姐祝你早日生B，做靚媽吓！
雖然嫁外國人，但李蕙敏其實係一個好傳統嘅女人！呢日特登揾助手陪睇中醫，見到女醫師時，仲不停咁問食咩藥、飲咩湯水對女人最好。
今年3月，英籍珠寶太子爺男友Nicallef喺峇里島向李蕙敏求婚，婚禮預定喺今年10月6日於英國舉行。睇見「悲歌女王」終於有好結果，媽咪姐真係戥佢開心。
養女活得好李蕙敏自細都以為自己同屋企人只係年齡上有好大差距，直至23歲時，先知自己原來係養女。不過一家人一齊生活咗咁多年，李蕙敏同養父好close，有啲咩事都會同佢傾，而大佢十幾年嘅哎吔阿哥又對佢好好，所以佢健康成長，仲入行唱歌。03年，養父過身之後，李蕙敏就成日陪養母行街，上個月嘅母親節，仲帶咗養母去食飯㖭！
李蕙敏廿三歲時，爸爸先話俾佢知佢係養女，但父女情一直有增無減。
擔任完老死黃偉文嘅演唱會嘉賓後，李蕙敏就更加想開屬於自己嘅演唱會，唔知呢個願望會唔會成真呢？
