下個月就係一年一度嘅書展，唔少𡃁模藝人都會趁機出寫真同書，其中楊愛瑾（Miki）今年簽新公司後，除咗為無綫拍咗兩部劇《神槍狙擊2013》同《貓屎媽媽》外，喺下月書展佢亦會推出文字相集《綿羊》。
早前Miki去咗泰國影相，七日之旅行程好緊密，Miki每日只得四個鐘休息。當中Miki仲玩濕身大解放，着三點式外加透視裝，若隱若現大玩熟女誘惑。
Miki喺水中影濕身相，唔止性感，仲展現另類美態。
之前簽過許穎（Phoebe）公司嘅蕭美卡（Mika），同公司解約後近日簽咗施念慈間公司，下月仲會出寫真。Mika趁之前有時間增值自己同減肥，成功減咗十幾磅，佢話：「雖然之前係有唔開心，但我冇放棄自己不停裝備，因為我覺得機會隨時降臨。」Mika話會努力追番失去嘅一年青春同機會，希望寫真大賣。
至於Phoebe嘅師妹梁晶晶（Bonnie）都會出寫真，仲博到盡幾乎全裸，只着內褲同用手遮胸。Bonnie同台灣型男柯震東幾熟，會唔會送本寫真畀佢？Bonnie話唔會，叫佢自己買嚟支持。
過咗檔嘅蕭美卡成功減肥，狀態明顯勇猛唔少。Bonnie成個心口都係忌廉，好明顯抄當年周秀娜條橋。
Bonnie向蕭亞軒認錯
近日柯震東同女朋友蕭亞軒冷戰，會唔會同Bonnie有關？佢話：「我識佢時佢冇交代有冇女朋友，如果真係因為我，我會同佢女朋友講聲對唔住。」
from:
http://hk.apple.nextmedia.com/entertainment/art/20130621/18306287
