周麗淇（Niki）的名字除與盛女掛鈎，由早前劇集《女警愛作戰》到近日《好心作怪》都令人聯想起女警，同樣帶着爽朗俠女性格演繹，拍住與緋聞掛鈎的黃宗澤（Bosco）演情侶，劇內有不少浪漫情景，但私下全不過電。劇外二人嚴如兄弟，每逢提起緋聞，Niki即維護拍檔，義氣當頭解圍，Bosco樂意受寵變小男人。
黃宗澤與周麗淇外形合襯，可惜尚欠一點點火花。
黃宗澤近日在無綫劇《好心作怪》中一人飾演兩個角色，分別演前期醫生哥哥及後期優柔寡斷的弟弟，圍繞與周麗淇發展感情線，提到優柔寡斷是否人生態度？Bosco緊張的說：「我做嘢好有目標㗎！只係角色今日唔知聽日事，最緊要享受人生啫。」而近期在電視螢光幕接連看到Niki做女警，男仔頭粗魯性格深刻，但亦有剛柔並重一面。今次二人同聲透露劇中有不少激咀場面，Niki笑說：「呢個唔係重點，但真係我拍劇以嚟咀得最多一次。」
二人開工時正值Bosco甩拖，碰上單身Niki，還以為二人有機會過電，豈料他們指難以撻着，Niki坦言未驚過：「開工時兩個都單身，當時已經有人話我哋會傳緋聞，最終只係好流咁傳，攞啲劇照嚟傳。」面對經常緋聞纏身的Bosco，Niki即搶答：「你哋問我就最好，同佢拍檔第二次，有啲嘢佢都好難控制，大家傳啫，太抬舉佢，何來有咁多女呢？我同佢就唔驚啦，只係傾得埋嗰種。」Bosco見拍檔努力為自己解畫後才表態：「係好朋友、好兄弟！」Niki即反駁：「兄弟好男仔頭，係好朋友。」Bosco抵死說：「你都有少少㗎。」
黃宗澤目前以工作為先，感情事隨緣。新劇《好心作怪》中，黃宗澤與周麗淇扮演歡喜冤家。
（左起）苗僑偉、萬綺雯、周麗淇及黃宗澤合作，充滿新鮮感。向來被視為福將的周麗淇，新劇反應不錯。
難忘水中激咀
Niki指Bosco是繼與謝天華合作後最好的對手，期間二人在寒天下合作了一場水底咀戲，是今次劇中最難忘經歷，Niki說：「場戲雖然好浪漫，但我唔識游水，細個時又浸親過，本來打算用替身，但去到拍時大家就勸我自己嚟，然後Bosco又話有救生員牌，嗰刻我就相信佢，將自己交咗畀佢。」Niki只能像樹熊般捉實Bosco，令Bosco大呼：「幾攰，拍幾粒鐘，要孭住一個人，扶佢之餘我仲要綁鉛令自己沉落水底，真係筋疲力盡，大家都浸到皺晒皮。」Niki近年亦轉戰到內地搵人仔，與無綫保持一年一劇，被Bosco取笑半退休狀態，十足十苗僑偉般鍾意做先做。
周麗淇與黃宗澤合作良久，連甫士都見默契。
後記：精人出口
訪問期間，Niki開朗健談，猶如開籠雀一樣，連平日口花花的Bosco都招架不來，當Niki一輪咀後，Bosco會說：「佢好識表達自己㗎。」相反到Niki被問緋聞問到打爛沙盤問到篤時，她會說：「我傳來傳去都係得一個。」Bosco不幫口，還笑笑口說：「佢咁叻答嘢，使乜我幫，我驚我越講越錯得多。」呢啲咪精人出口，笨人出手囉。
from:
http://hk.apple.nextmedia.com/entertainment/art/20130621/18306183
