被全城插爆的「維穩騷」《香港巨蛋音樂節》，曾經為反國教站台唱《睜開眼》的樂隊RubberBand（RB）與Mr.疑受壓參與演出，RB成員泥鯭日前在facebook發表「被強姦論」，主音6號更自責危機感不足，前晚RB跟公司開會商討，尋求解決辦法，惟至昨日截稿前仍未有定案。
林海峰（左）跟泥鯭十足孖生兄弟，他笑言可犧牲自己救泥鯭。
梁詠琪撐RB
「維穩騷」成為全城熱話，昨早林海峰主持商台節目《在晴朗的一天出發》慨嘆：「梁粉破壞力幾強，香港兩大樂隊就咁中招！」跟泥鯭十分似樣的林海峰更抵死說：「如果我7.1喺維園行嚟行去，實俾人追住嚟鬧：『泥鯭你條友走去唱音樂節』，我提議泥鯭照唱音樂節，我去7.1遊行；或者泥鯭去遊行，我代佢唱韓文版《睜開眼》，我願意犧牲去救泥鯭幫RB，大部份人誤會RB，𠵱家唔係要鬧泥鯭，係要捉龍躉。」林海峰揶揄《香港巨蛋音樂節》應該改名：「可以叫香港滾蛋音樂節，或者叫震蛋都得，𠵱家搞搞吓變香港完蛋音樂節。」
巨蛋騷被指跟4月大馬政府搞的晚會類似，當時有份獲邀演出的梁詠琪以「私人理由」取消行程，被網友封為「民主女神」，對於巨蛋騷被指為大馬騷翻版，梁詠琪說：「香港係自由之都，每個人都有自己選擇，去遊行會唔會因演唱會唔去呢？唔好將焦點放喺歌手身上。」組合C AllStar昨日在將軍澳錄影無綫節目《勁歌金曲》，力撐RB是認真做音樂及關心社會的樂隊；DJ Donald則在微博留言：「七一音樂會人人嘈爆，假如你係主辦單位，你會點做呢？我答即刻宣佈改夜晚做！」
Mr.尊重唱片公司決定照唱維穩騷，自嘲是窮樂隊「無銀用」。梁詠琪曾以「私人理由」辭演大馬政治騷，被網友封為民主女神。
from:
http://hk.apple.nextmedia.com/entertainment/art/20130620/18304686
