39歲嘅李思捷，呢排因為《玩嘢王》而人氣急升！佢同47歲陳雅倫單緋聞愈睇愈真，都幫咗唔少㗎。不過，男方手揸24歲「春卷」王寶寶，死口話同雅倫姐姐係「姊弟情」喎！
無嘢嘅，大家雙眼就係證據。周六（8日）晚，李思捷喺荃灣愉景新城主持《玩嘢王》最後一集播映會，明明應該喺大陸做嘢嘅陳雅倫，失驚無神跌晒膊咁殺到！思捷「弟弟」驚喜到吖，又搭膊，又攬腰，再拉住手送「姐姐」入座。嗱，有記者喺度，呢pair「姊弟」都咁寃氣！落到停車場攞車嗰陣，佢哋以為無人睇到，直情大解放，思捷左右手輪住攬腰，上車時又由膊頭捽到落手踭。噢，喺車廂仲funny，女嘅主動挨埋去咬耳仔，然後男嘅又成個身瞓埋落「姐姐」度。春卷呀春卷，你後生，接受能力高，可唔可以解釋俾媽咪姐聽，呢啲叫乜嘢「姊弟情」呢？係咪狼虎嗰種呀？
嘩！邊有咁索嘅姐姐㗎！（設計對白）早前自爆一直當陳雅倫係女神嘅李思捷，一見到人哋跌膊，忍唔住狂𥄫！吖，𥄫咩呢呵？梗係想幫「姐姐」數吓心口有幾多粒雀斑嘞！
一向識食嘅李思捷，見性感撐場嘅雅倫姐姐影完相，即刻攬腰護送。個樣仲……想點呢？
姊憑弟貴，呢晚有李思捷傍實嘅陳雅倫，坐正喺無綫高層余詠珊隔籬，連家燕姐都要坐開㖭。
正印春卷Hi，你哋係咪當我死㗎？（設計對白）
車場左右攬
姐姐，弟弟想和你去吹吹風呀！完騷後，唔知有記者跟嘅李思捷左手攬住陳雅倫條腰，右手指示助手去攞車，威呀！
去到車門邊，仲未攬完喎！今次換右手先。雅倫姐姐冧到笑晒，難得旁邊嘅捷媽亦見慣不怪。
上車上下捽終於坐上車，準備閂車門嗰一刻，思捷弟弟都無浪費㗎！一手由雅倫姐姐個圓渾膊頭，捽到落最為人忽略嘅手踭位。滑晒嘞！滑晒嘞！唔該細佬。
車廂無限touch
你以為「姊弟情」就係頭先嗰幾張相咁膚淺嘅咩？思捷弟弟，你左邊面係咪好鬼熱呢？雅倫姐姐（左）教你，乜嘢叫主動出擊！
唔得嘞！情到濃時，李思捷瞓身挨落陳雅倫身上，sweet到呢！你諗咩呀？媽咪姐講緊「姊弟情」。思捷，呵！
