上星期連續多日過30度曬到傻，行出街都熱到出晒汗，靚女又怕熱又怕曬黑，戶外活動一定耍手擰頭。
現就讀香港中國婦女會馮堯敬紀念中學中六的李佩珊（Zelia）卻好享受炎炎夏日，她無懼烈日當空，最愛單車周圍去，但Zelia幾個月前原來還是一名宅女，最愛在家煲劇，「以前我成日喺屋企煲劇睇《Running Man》，令我咁大改變全因受前度影響！」
李佩珊（Zelia） 香港中國婦女會馮堯敬紀念中學中六雖然家住馬鞍山私人屋苑，附近有不少單車徑，不過Zelia坦言：「我冇咩運動細胞，運動唔叻，又怕熱，跑兩步都會氣喘，加上驚曬會出雀斑唔靚，夏天一定會做足防曬工夫先出街，朋友約我都最好夜晚先出街！」
氹前度踩車本身同夏天絕交的Zelia以愛上踩單車，全因為想氹前度開心，「我同佢係同校同學，佢喺學校跳舞嗰陣已經覺得佢好charm，直頭係我心目中嘅白馬王子，直至上年11月嗰陣同咗佢一齊，第一日約會唔係去行街睇戲，佢竟然約我去踩單車，真係未試過同男友去踩單車，我都識踩單車嘅，不過唔係勁，佢教我踩，當啲陽光照住佢，我真係覺得佢就係我要搵嗰個，十足睇《那些年》，柯震東咁有feel！」
雖然Zelia視前度為真命天子，但男友竟然誤信朋友讒言而分手收場，「分手嗰刻真係晴天霹靂，但我冇放棄佢，𠵱家大家仲有聯絡，下個月仲諗住一齊過生日，我都唔會放棄單車，如果唔放棄得就連搵佢嘅機會都冇！」希望Zelia成功箍煲啦！
Zelia曾經被模特兒公司看中入行做兼職model，「接過幾個job影吓相，不過我唔想做𡃁模，就算有好多酬勞我都唔接，𠵱家冇再續約，得閒都係幫朋友影吓相就算！」
身高5呎7吋的Zelia擁有一雙修長美腿，不過她自爆：「其實我細個踩單車成日整親，左腳膝頭哥對落有條疤痕，不過我狂搽嘢保養番，𠵱家先淡番冇咁覺眼咋！」
兼職儲錢希望到英國讀書兼周圍踩單車的Zelia為儲旅費，現在在韓服店做sales，「希望儲多啲錢可以去多啲地方周圍踩！」
恨生細路鍾意小朋友的Zelia年紀尚輕，所以她就選擇到小學教普通話興趣班，「我好鍾意細路仔，第時最好生一仔一女，仲要教佢踩單車！」
校花校草：只要是各學界的靚仔靚女，《FACE》就會介紹給大家認識。
