王維基為首的香港電視雖未獲發牌，但仍不停燒銀紙拍劇，惠英紅最近助陣參演新劇《我阿媽係黑玫瑰》，其中一名由無綫過檔的甘草演員丁主惠前晚向本報訴苦，指上周拍攝一場被推跌戲時，未獲安排替身，最後要她親身上陣，令她拉傷肌肉，現在需戴頸箍兼做物理治療。丁主惠公開希望王維基關注事件。
王維基揸弗的香港電視近年頻頻出招向港府施壓求發牌，同時不停安排旗下藝人拍劇儲存貨，最近在網上先後播出《童話戀曲201314》、《開腦儆探》、《警界線》和《歲月樓情》四套新劇的片段，近日又邀來金像影后惠英紅主演新劇《我阿媽係黑玫瑰》，該劇拍得如火如荼，但甘草女演員丁主惠上周一開工時發生意外，她前晚向本報披露受傷經過，並大呻受不公平對待。
戴着頸箍的甘草演員丁主惠，前晚指上周拍香港電視劇集《我阿媽係黑玫瑰》的一場被推跌戲，沒獲安排替身，要她親身上陣，最後令她拉傷肌肉。丁主惠在blog顯示寫給王維基的投訴，下為中文譯本。
拉傷背肌須戴頸箍
年過半百的丁主惠演出過不少無綫劇，至去年9月簽約香港電視兩年，上月為其首部香港電視劇集《我阿媽係黑玫瑰》開工，跟扮演黑玫瑰的惠英紅有對手戲。不過，丁主惠上周一拍攝推撞鏡頭受傷導致後背肌肉拉傷，經診治後現在要戴頸箍。她前晚在其中環半山寓所接受訪問，表示受傷戲份是被黑玫瑰追捕時推倒落地，但當日的黑玫瑰卻非惠英紅，只是她的替身，丁主惠說：「我唔係就咁跌，係要向前扭，真係好危險，咁就出事。」她指根據程序表，她跟對手均有替身代勞，但現場未看到替身，向劇組提出時又沒人解答，丁主惠當時擔心自己沒受過專業訓練，及後在不願意情況下上陣最終出事，她說：「我第一下跌係就住，到咗第三次，武指就唔係咁開心，教我你要咁跌，但佢哋冇offer護墊畀我，係我提出先畀，唔係跌咁簡單，跌過程要訓練，我有講我出身演員，唔係替身，但當然冇人聽到，只好照做。」
丁主惠跌後痛至叫了出來，但怕阻礙進度，只休息15分鐘便頂硬上繼續，誰料又被要求拍第二場，同樣又要被推跌，這次卻沒墊上榻榻米保護，令她傷上加傷。丁主惠馬上抗議：「我話唔得，第二次跌落石屎地，仲要對手個替身跳板後，打觔斗落喺我面前，呢個動作好危險，唔小心跌歪咗會跌落我度。於是我認真同導演講，對唔住，我唔拍，之後先搵替身出嚟。」她不明現場明明有替身安排，卻要演員親身上陣。問她會否覺得因為是甘草才受冷待？丁主惠力數說：「我角色都幾重要，係平等，大家都咁重要，我諗問題係佢哋唔尊重演員，唔識分別演員係演戲，唔係做替身嘅嘢。」
惠英紅在劇集《我阿媽係黑玫瑰》中孭飛演黑玫瑰。王維基在《我》劇宣傳時，曾向女主角惠英紅獻花。資料圖片
發聲盼王維基關注
除了受傷，丁主惠也遇上不禮貌對待，事緣受傷前一天在馬鞍山開工，當日兩次向劇組拿飯盒不果，至晚上10時45分工作人員竟稱飯盒已丟掉，她說：「大佬呀，我8點鐘同PA（助導）問，你唔畀，𠵱家問話掉咗，當時唔識嬲，點解啲人咁做嘢，好過份。」她翌日打算向藝員部反映，卻意外受傷，之後她再致電有關部門，對方回覆：「吓吓吓，咁都得？」答案hea爆，丁主惠最後在網上向王維基投訴，投訴卻轉交另一部門，負責同事表示會調查。
丁主惠受傷翌日便往看醫生，她說：「佢話扭到後背，因為肌肉連住，扭親會扯到頸，整到我頭痛，醫生開咗止痛藥，要做物理治療，影響到日常生活。」她指這次控訴，是希望向口口聲聲關注員工的王維基反映，並非要追討賠償，她續說：「點忙都要注意吓，有同事話同劇組講咗，但回覆我親自做逼真啲，不過推我嘅都係替身。」可覺公司安排大細超？她說：「係公司疏忽，我覺得要講出嚟畀王生（王維基）知，其他藝人都要知，我哋演員係有權利。」
丁主惠曾以高齡拍攝大膽寫真。
香港電視發言人鄭靜雯昨證實丁曾在王維基網誌留訊息，當日他太忙未看到，行政總裁杜惠冰獲悉已即時了解，鄭靜雯昨在電話說：「行政總裁親自打電話畀佢了解現場情況，佢受咗傷，我哋會繼續跟進。至於飯盒一事，可能係當晚劇組溝通出問題。」鄭靜雯謂替身安排視乎拍攝動作的危險程度：「丁主惠角色企喺度俾黑玫瑰推跌，當時有榻榻米同護膝提供。」至於扮演黑玫瑰的惠英紅，據知她跟丁主惠的對手戲是替身代勞，小紅昨在電話說：「我有聽過呢件事，我唔喺現場，唔清楚件事。」
此外，香港電視食髓知味，前晚再在YouTube播出夏雨、黃日華和鮑起靜主演新劇《歲月樓情》首集約5分鐘片段，至昨晚截稿前已有近3萬點擊。該劇內容似家庭倫理劇，甚有港台劇感覺，幾位老戲骨表現出色，片段燈光仍是偏暗。
from:
http://hk.apple.nextmedia.com/entertainment/art/20130602/18280421
