無綫新一輯嘅經典遊戲節目《超級無敵獎門人終極篇》將會喺呢個星期日回歸，獎門人曾志偉前排聯同獎老錢嘉樂、金剛、洪天明、阮兆祥，搵咗高海寧、呂慧儀、梁靖琪同謝天華呢班玩得之人，拉大隊去咗日本福岡拍外景，為今個節目打頭陣。雖然以前啲獎門人次次有驚喜，每次都令觀眾大飽眼福，但係今次福岡之旅認真潔淨，甚少香艷驚嚇場面，絕對啱晒合家歡觀看。
獎門人嘅鐵腳高海寧同呂慧儀，俾志偉潑到成身濕晒，但一樣玩得咁高興。
金剛除剩底褲
喺秋月城跡溫泉區試玩「超級無敵潑水節」，獎門人首先向高海寧、呂慧儀和梁靖琪等女隊員問啲同男性有關嘅問題，答錯就會俾獎門人及獎老「潑水」，高Ling同長腳蟹個個都玩到濕晒身，不過玩之前個個着晒藍色圓領tee，最多只可以睇到浮凸嘅身材，濕身噴血統統欠奉。俾人話全天候做觀音兵，黐實Mandy Lieu嘅金剛，當然成為獎門人和獎老嘅惡搞對象，搞到金剛除剩條底褲，露兩點見人！
洪天明願賭服輸，玩輸遊戲接受獎門人畫大花面。咁多個獎老，以金剛嘅輩份最淺，自然成為被整蠱嘅對象。
過往曾經喺獎門人出現過嘅遊戲，好似「超級無敵拍拍拍」、「超級無敵到到到」同埋「辣辣壽司」都重現螢幕，正如志偉話齋，今次志在大團圓，遊戲會減低難度到最容易玩，唔需要太大體力，希望可以搵多啲以前玩過嘅老友，夠膽齊齊上嚟再玩過。
from:
http://hk.apple.nextmedia.com/entertainment/art/20130524/18269470
