劉德華老婆朱麗倩上年5月9日生咗個女，改名劉向蕙，英文名叫Hanna，劉華過咗50歲做老竇，梗係開心啦！今日就係佢個女滿一歲嘅生日，所以佢噚日特別喺尖沙嘴半島酒店同個女搞咗個生日會，除咗佢一家三口主人家出席外，華仔父母、好友苗僑偉（三哥）、鄭秀文、吳君如、黃日華、林子祥同葉蒨文夫婦都有到賀。
雖然華仔已婚有女已經唔係秘密，但佢依然好低調，噚日大約下晝一點，佢出動四部拉晒簾嘅黑色七人車送佢同老婆、囡囡去半島酒店，酒店專登開咗後門停車場畀佢四部車停泊，落車時除咗華仔一家三口，其餘三部車都係坐滿保鑣，一團保鑣將華仔同家人團團圍住，護送上酒店樓上嘅宴會廳開生日會。
華仔噚日幫個女喺半島酒店搞一歲生日會，請咗唔少圈中朋友嚟！
三哥：都幾開心
華仔喺女兒生日會，全程四萬咁口，心情靚極，一副有女萬事足嘅老竇樣出晒嚟，生日會大約3點幾結束，噚日馮仁昭打畀三哥，問佢係咪啱啱去完華仔囡囡生日會：「呢啲都係問番華仔本人好啲，佢一向低調。」再問佢個生日會搞得開心嗎？三哥話：「都幾開心，不過佢啲嘢都係唔好講咁多啦！」
林子祥、葉蒨文同吳君如噚日參加華仔個女生日會。
from:
http://hk.apple.nextmedia.com/entertainment/art/20130509/18253631
