黎耀祥、徐子珊、鄧麗欣（Stephy）等噚日喺銅鑼灣出席雜誌頒獎活動，咁啱今日係祥仔49歲嘅生日，又係沈震軒（Sammy）嘅30歲生日，佢哋呢排都好黑仔，祥仔部新劇《神探高倫布》俾人鬧到飛起，而Sammy因為悼念故友陳僖儀（Sita），又俾人話博宣傳，希望佢哋大一歲會行番好運啦！
今日係黎耀祥嘅生日，佢講笑話自己未有中年危機。徐子珊稍後會同黃子華拍新劇，佢笑稱要努力減磅，先襯得上好瘦嘅黃子華。
子珊減肥襯子華
問祥仔有冇中年危機？佢笑笑口話：「當年由3字去到4字，覺得年輕不再，感受會深啲。」講到舊拍檔鄧萃雯力數《金枝慾孽貳》冇劇本，祥仔就撐番無綫，佢話：「未去到咁惡劣，冇劇本係冇可能，10集劇本都應該有，去到12、13集就執到，有5、6集都OK，電視劇模式不嬲都係咁。」而沈震軒就透露原本同Sita開嗰部新戲未知新女主角係邊個，但Sita離世，令佢更加珍惜眼前人。
另外，徐子珊話同黃子華合作部新劇就快開工，佢話要專登減肥嚟襯番好瘦嘅子華，佢話：「𠵱家每日食一餐咋。」Stephy就被追問佢幾時同方力申結婚，問佢介唔介意未婚產子？佢話：「我結婚都係為咗生小朋友，不過我個人本身好安全。」
from:
http://hk.apple.nextmedia.com/entertainment/art/20130504/18248402
