都話陀住4個月「小春子」、29歲嘅應采兒（丁丁）對銅鑼灣情有獨鍾，前日4點左右佢又同鐵腳拖友鄭希怡（Yumiko）喺老銅出現。丁丁戴住墨鏡同着住黑色大肚婆連身裙，身旁同樣戴住墨鏡嘅Yumiko全程傍到大肚婆實，佢哋由利園商場一直向崇光方向行去，沿途好多途人認得佢哋，行咗10分鐘去到景隆街，原來丁丁架七人車泊咗喺度，Yumiko扶咗大肚婆上車之後就上的士離開。
打扮到成隻垃圾蟲（小圖）嘅小春過馬路嗰陣拖到老婆實一實。大肚嘅丁丁（左）行得仲快過身邊嘅Yumiko。
睇過萬蚊梳化
隔咗冇耐打扮到成條70年代垃圾蟲嘅陳小春出現，佢會合老婆後一齊離開，佢哋開車去到跑馬地入咗一間傢俬舖，裏面嘅傢俬閒閒哋過萬，不過當小春落車見到有採訪車喺度即時黑面，即刻用手機影咗相放上微博寫住「有狗」加貼四把槍圖案，小春就嚟做老竇就咪咁小器啦！
兩公婆對舖頭裏面嘅梳化非常有興趣。陀住4個月小春子嘅丁丁一馬當先離開傢俬舖。
佢哋對舖頭裏面嘅梳化非常有興趣，前後睇咗一粒鐘，但係都冇收穫。之後佢哋去咗另一舖頭繼續睇，過馬路嘅時候小春表現得好溫柔，拖實老婆過馬路。
from:
http://hk.apple.nextmedia.com/entertainment/art/20130427/18241483
