蔡卓妍（阿Sa）喺北京參加嗰個乜乜《中國星跳躍》，企上五米高台一嘢撻落水，撻到攤攤腰兼要睇骨醫。折腰唔係為咗五斗米，係為咗做善事，真係孝感動天。唔知佢係咪受張栢芝當年嘅感染呢？
栢芝亡命飛車差啲搞到癱瘓，諗起都覺得牙煙。
話說02年1月，栢芝幫《慈善星輝仁濟夜》表演「炮彈戰車衝天飛」環節，直頭係搵命博，佢錄影前已經話：「雖然我以前拍過好多飛車鏡頭，但今次我唔可以NG，亦冇機會NG，我要靠自己應付。」結果佢成功飛越五部私家車，但喺落地一刻，佢上半身震一震，然後見佢合埋眼，表情痛苦，並舉手示意出事。栢芝出事後即刻送咗去將軍澳醫院搶救，之後再轉送浸會醫院深切治療部，事後被證實胸椎骨第十二節碎裂，壓住神經線，但好彩冇後遺症。
栢芝呢次演出籌得130萬善款，但佢就因為要養傷而喪失好多搵錢機會。話時話，栢芝嚟緊都要參加跳水比賽，希望佢今次小心啲啦！
from:
http://hk.apple.nextmedia.com/entertainment/art/20130427/18241481
