http://hk.apple.nextmedia ... 130424/51367719
由侯孝賢導演執導嘅武俠電影《聶隱娘》，話拍話拍，話咗7年，去年9月終於開機，女主角舒淇亦於10月入組，日打夜打仲要吊威吔以致周身瘀痛。上周舒淇37歲牛一，當時仲有報道話佢喺台灣拍緊《聶隱娘》，當地好友同戲組人員一齊陪佢於酒店開P慶祝，但今日台灣傳媒報道指，原來《聶隱娘》已於舒淇生日(16號)之前已停拍。
消息指，呢套《聶隱娘》成本高達1億港元，至於點解喊停？好簡單，因為銀彈已盡，冇晒資金。但舒淇嘅戲份，仲未拍晒。呢部戲拍咗好耐都未拍完，預計要等到6月先拍得晒，舒淇更因為撞期而辭演6月同古天樂合拍嘅《濟公》。依家變成雙失。
咁究竟會爛尾定係再撲水？暫時未知。該片屬合拍片，演員除咗有舒淇，仲有張震、內地導演馮小剛太太徐帆，就算經濟幾困難，大師號召力不減。
《聶隱娘》係以唐代藩鎮割據為背景，描述安史之亂40年後，都于侯聶鋒之女聶隱娘自幼被道姑帶走，訓練成女刺客，某次行動因發現目標人物小孩玩耍，心生惻隱陷入掙扎。至於取景地點，則包括湖北武當山、神農架；台灣中影文化城室內場景、宜蘭；日本京都、奈良一帶，可謂不惜工本。
