現年30歲嘅「長腳蟹」呂慧儀，同前港男老公黃文迪（Dickson）拍拖成十年，前年仲結埋婚，不過兩人一齊咁耐，𠵱家仍然好鬼恩愛，成日孖住拍拖食飯行街，真係甜到漏。
呂慧儀同Dickson日前拍住拖同朋友嘆意大利菜，佢哋邊傾邊玩手機，非常合拍。成日孖住出動嘅呂慧儀夫婦，日前約埋一男一女朋友食飯聚舊。
甜蜜挨老公膊頭
日前晚上10點鐘，呂慧儀同Dickson約咗一男一女朋友到大坑嘅No.5 Italian餐廳食晚飯，兩人即使喺朋友面前都繼續晒幸福，邊玩電話邊笑，呂慧儀睇得開心之際，仲挨埋去老公個膊頭度，真係sweet爆。
Dickson食食吓發現有記者喺門口，即刻通知老婆，兩公婆仲大方向記者笑住揮手，之後Dickson好體貼叫侍應拎三杯飲品畀記者。食足個幾鐘，呂慧儀同Dickson就攞車走人，唔知Dickson係唔係飲咗酒，所以就由呂慧儀開車，不過呂慧儀就似乎好驚青，仲要老公行落車睇吓啲位，之後先慢慢成功將架車駛走。
呂慧儀負責揸車，佢同Dickson見到記者即刻揮手打招呼。呂慧儀怕倒後時會撞到人哋架車，所以與老公先後落車睇位。
from:
http://hk.apple.nextmedia.com/entertainment/art/20130416/18229285
