黃子華、許志安同森美、阮小儀噚日喺香港仔出席「饑饉三十」活動，仲同現場營友分享同打氣。子華透露幾個星期後就會返無綫開工，今次會同成日有緋聞嘅徐子珊合作，怕唔怕同佢傳緋聞先？子華講笑話：「最驚冇緋聞，我會盡量配合，畀機會大家發掘。」子華話都有睇過下子珊拍嘅劇，覺得佢係可塑性好高同好用功嘅人。新劇會唔會有接吻親熱戲？介唔介意？子華話：「嘩，同一個靚女咀點可以話介意，會落地獄㗎。」
趁未開工前子華一個人去旅行：「去咗好多地方，之前喺泰國經過一條好黑嘅天橋底，見到有個女人抱住個小朋友不停喊，我忍唔住畀咗錢，覺得付出好少就可能有個契機令佢轉變，點解唔做呢？」
森美同阮小儀喺台上又鬥氣，安仔索性喺旁邊觀戰。黃子華舉起OK手勢，睇嚟佢已準備好為新劇開工。
偷食安仔唔諗往事
當年饑饉偷食嘅安仔話以前嘅嘢唔好諗，以前都有去過貧窮地區探訪，安仔聲稱唔介意同女朋友鄭秀文（Sammi）一齊去探訪，因為係好有意義嘅事。
而前晚羅力威同謝安琪等人亦現身為營友唱歌表演，但當晚氣溫驟降，搞到謝安琪要着住羽絨匿埋，羅力威指緋聞女友雨僑豐胸後冇見過面，佢唔反對女仔豐胸。
from:
http://hk.apple.nextmedia.com/entertainment/art/20130408/18220161
