余文樂同吳雨霏（Kary）驚爆樂雨戀，2月佢哋秘密歐遊，點知俾網友踢爆戀情，雙雙返港嗰陣仲用情侶篋，雖然有fans唔係咁接受佢哋拍拖，仲喺網上掀起駡戰，但樂雨懶理fans反對，前晚拍拖出巡享受二人世界。
前晚佢哋去銅鑼灣開平道Cubus大廈嘅食肆撐枱腳終於斷正，前晚9點9，戴住眼鏡嘅樂仔單拖離開，擺明唔想俾人影到同女友合照，記者叫佢停低傾偈，樂仔邊行邊話：「我趕時間，唔好意思。」問佢係咪同女朋友食飯？樂仔無奈指一指上面：「佢喺樓上。」之後行去利園方向。
Kary：好似好揚
4分鐘後，同男友玩前後腳離開嘅Kary終於落樓，佢着皮短裙襯豹紋鞋袋，見到記者仲扮淡定揮手，問佢點解分開走？Kary唔出聲急撇，記者叫佢企定影相，Kary停低兩秒後話：「都係唔好，好似好揚。」然後行去利園方向停車場，上咗樂仔約值340萬嘅林寶堅尼媾女戰車，兩人俾記者包圍影相，樂仔黑面絞低車窗話：「唔好攔喺前面，好危險嘛，咁樣車到你哋。」Kary就一面無奈，樂仔喺灣仔狂兜圈企圖擺脫追訪，但係失敗咗，之後佢就直接送女友返跑馬地香閨。
樂仔後來喺微博呻：「剛和她食飯被一群記者一擁而上不停影相……我承認我有點生氣，但我知如果我有脾氣結果只會更慘，所以最後我選擇忍受然後報以一個微笑離去……」
from:
http://hk.apple.nextmedia.com/entertainment/art/20130405/18217067
