今日是張國榮（Leslie）逝世十周年，陳淑芬和他相交二十二年，在她眼中Leslie對朋友有義，對喜歡的人更有情，他因為不想唐鶴德受委屈，勇敢公告兩人關係，愛得坦蕩。看着Leslie受抑鬱症折磨走上絕路，陳淑芬遺憾自己幫得不足，期盼他能再活一次，讓自己可以處理得更好。
【想你十年之有心人】陳淑芬81年為華星成立唱片部，第一個簽約的歌手就是Leslie，她日前接受本報記者專訪說：「佢個人好進取，不斷提升自己知識、品味、修養，佢係好勤力藝人，好守時，事事預先做準備，譬如拍戲會預先消化劇本，好似花幾個月時間學京腔拍《霸王別姬》。」陳淑芬覺得Leslie越紅修養越好，她說：「佢待人接物一直好細心，譬如對基層員工特別關照，拍完戲又約甘草演員食飯，等佢哋覺得被關心。」
Leslie走了十年，陳淑芬對他依然寵愛未忘，Miss You Much！
「Leslie唔想唐唐受委屈」
重情的Leslie，對後輩和好友更是疼錫照顧，陳淑芬說：「佢對於一啲後輩，想提攜佢哋介紹嘢做，嗰時好似林嘉欣，會約佢嚟屋企食飯，冇話刻意介紹導演，但約嗰班人都係拍戲，等佢認識多啲；Leslie又會約阿梅（梅艷芳）同導演一齊食飯，等阿梅多啲機會，佢真係好nice，唔會刻意話介紹邊個你識，好自然地令到件事發展。」
當年Leslie和譚詠麟（阿倫）在樂壇鬥到難分難解，兩批歌迷互罵，言詞不堪入耳，Leslie和陳淑芬心中都不好受，她說：「佢個心唔舒服，我比佢仲竧𣉢，歌迷喺度嘈搞到佢好尷尬，其實佢同阿倫冇嘢，佢都好無奈，無端端俾人鬧，梗係唔開心！」
Leslie不但對朋友有義，對自己喜歡的人，只有月亮可以代表他的心，故毅然公開跟唐鶴德的愛，陳淑芬說：「Leslie好nice，因為佢鍾意嘅人，唔想佢受委屈，亦想啲人知道佢（唐生）係佢伴侶，Leslie唔怕人知，但諗深一層，原來會帶畀伴侶煩惱，譬如唐生返緊工，有啲記者扮客人煩佢，Leslie梗係會嬲㗎！」
「再嚟一次我會處理好啲」
追求完美的Leslie，在人生的璀璨期，卻被抑鬱症折磨，結果走上絕路，陳淑芬慨嘆：「抑鬱係一個病，唔係開心就冇呢個病，可能我哋對呢個病認識太少，唔知後果咁嚴重！佢病咗年幾兩年，大家朋友都有幫佢，不過可能幫得唔夠，如果可以再嚟一次，我諗會處理好啲。」Leslie的離去，令大家關注了抑鬱症病人，她說：「我覺得佢帶畀好多人正面睇呢個病，唔怕講出嚟有病。」
from:
http://hk.apple.nextmedia.com/entertainment/art/20130401/18213324
