黎明愛將文詠珊（Janice Man），前年宣佈跟拍拖七年有米男友李冠峰分手後，仍經常被拍到與對方出雙入對，今年一月，二人到大坑食糖水斷正，事後JM大方表示二人再見亦是朋友，甚至不排除復合。女方主動放聲氣，以為舊情復熾有轉機，但原來上月底JM已正式同前度斬纜，並與貌似組合農夫成員陸永的太子爺衞以德撻著。拍拖唔夠兩個月，新歡已自由出入JM屯門香閨，並以男主人身份，為兩人小天地添置日用品。
前後腳
明知有記者，二人離開餐廳後，全程扮唔熟，前後腳去攞車。
開餐前，JM拉埋助手在後巷玩自拍。食飯斷正後，由友人陪住匿入擎天半島。
繼續扮唔熟
JM由新男友的GTR跑車車尾箱攞了一包物件到朋友的Bentley房車，繼續扮唔熟，然後各自走人。
被迫分頭走
日前，JM出席完Chanel活動，便急急腳坐保母車離開，原來當晚相約了新歡衞以德到灣仔星街食日本菜。開餐前，被黎明封為模art的JM把握時間，在保母車旁的陰暗後巷擺甫士狂影，未幾，梳了all back髮型、著皮外套貼身褲，遠望有七分似陸永的衞以德，揸住價值七十多萬的白色新款GTR現身。
見女友未影夠，衞以德便自動自覺去泊車，而JM則影了足足二十分鐘才捨得停手，之後跟男友前後腳走入星街的六角日本餐廳開飯。
由七點半食到十點，JM跟衞以德以及一大班朋友陸續離開。當發現有記者，JM即醒目同男友咬耳仔通風報信，並打開男友的GTR車尾箱，無癮地攞走一袋物件，搬到另一朋友的Bentley房車上，之後二人分別開車離開；被迫丟低男友的JM，乘友人的Bentley駛入圓方擎天半島豪宅，運路走。
JM去年十二月24歲生日，在新居的會所舉行了動物party，扮兔仔的她在會所外影相。新男友放工先飛車到荃灣一商場內超市掃食物，入貨後，再入屯門JM新居。
伯母政策
翌日，不用開工的JM，在位於屯門掃管笏月租萬多元的新居未有外出。幫老豆打理生意，屋企做製衣的衞以德，放工後即趕住見女友。校準時間五點離開葵湧辦公室後，先到荃灣滙景廣場吉之島，買了大堆食物及日用品，再颷車直抵JM香閨。
據瞭解，JM跟衞以德拍拖唔夠兩個月，能夠砌低有九年感情基礎的情敵李冠峰，除因為跟JM志趣相投，同樣愛打扮之餘，衞以德更懂得行伯母政策討好老人家。二人於農曆年間開始拍拖，但衞以德竟願意犧牲二人世界，孖住女友以及JM媽三人行。將JM母女氹得貼貼服服，難怪JM在三月初的活動上，公開將較早前有機會同前度復合之說，完全推翻。
對於撻著製衣太子爺衞以德，JM回應：「我哋係好朋友，識咗一段時間。（佢上去你新屋喎？）嗰日有成班朋友響我屋企，大家都分別買咗嘢食上嚟，唔好亂諗呀。」
JM被黎明稱為「模ART」升呢後，除拍電影，亦不時出席大品牌時裝騷。入行後即被踢爆跟有米李冠峰拍拖，二人不避忌行商場shopping。
欲斷難斷
舊嘅唔走，新嘅唔嚟！Janice Man與前度肥仔男友李冠峰，由拍拖到分手，之後再傳出翻撻，足足拖拉了九年。10年女方曾在微博暗示欲斷難斷的心情：「這刻是我最難捱的難關，想放手但猶豫，令我放不開……」到11年，二人正式宣佈七年情玩完，但其間卻不斷被人發現密會、陪買衫、前後腳到大坑撐枱腳甚至一齊睇戲，關係糾纏不清。直至新歡出現，Janice Man終於搵到答案，決定與拖拉多年的舊愛李冠峰正式畫上句號。
JM媽打扮新潮，兩母女不時孖住行街。農曆年間，JM跟新仔陪媽咪在尖沙咀行街，其間三人到便利店買飲品。
轉場睇戲
今年1月，跟前度依然未斷曬，在大坑食糖水跟住去睇戲。
食糖水
跟張家輝拍電影《大追捕》，她自言投入角色而導致半年情緒低落。
