無綫處境劇《愛．回家》，因為內容啱師奶口味，所以口碑唔錯，收視亦keep得住29%，照理劇中演員應該好多人識先係，但原來好多嘢唔係想當然㗎！
就講喺劇入面飾演林漪淇同徐榮細女、羅天宇細妹嘅蔣家旻，佢演技唔錯，記得佢喺《天與地》入面飾演後生版佘詩曼時，已經受網民激讚。不過早幾日，媽咪姐就撞見啱啱出席完活動嘅蔣家旻。佢一隻手挽住大袋嘢，另一隻手拖住個篋，逼完地鐵又要等巴士，好慳家！但沿途所見，都好似冇乜人認得佢咁。後生女，加油呀！
蔣家旻喺活動上好給力，擺晒甫士俾fans影相。但活動過後，佢就上演one man band，孭大袋拖行李篋搭地鐵，完全食自己。
蔣家旻喺地鐵冇人認得，到排隊等巴士（右圖），同樣前後左右冇一個認得佢係蔣家旻，有啲悲哀。
