張兆輝、周海媚、徐子珊同岑麗香演出嘅無綫新劇《神槍狙擊2013》近日不停趕戲，前日上晝見香香演嘅女飛虎喺尖沙嘴出現拍劇，講佢同班男飛虎出動執行任務，同日夜晚佢哋就拉隊去深水埗醫局街，仲係由徐子珊帶隊㖭！
徐子珊同楊瑞麟前晚趁拍劇空檔，不停玩自拍，其間子珊仲舉V擺出招牌高潮眼，睇嚟影到好high喎！鏡頭前嘅子珊同魯振順拍劇過招，神情好嚴肅。
鏡頭前嚴肅
前晚約8點半，張致恆（Steven）、港男陳志健、魯振順、楊瑞麟同張兆輝等浩浩蕩蕩出現，飾演警官嘅徐子珊就着晒成套套裝現身。前晚場戲除咗出動咗十幾名演員，仲搵咗差唔多40個臨記做記者同圍觀者，加埋啲閃住藍燈嘅警車，如果唔係見到攝影機，真係以為出咗事。
劇情就講飛虎隊破門救出傷者，做警官嘅徐子珊被一班記者圍住問嘢。鏡頭前嘅子珊好鬼嚴肅，一到唔使埋位，佢就同楊瑞麟不知幾好傾，兩個人仲喺度玩自拍又睇番啲相，子珊仲擺出佢嘅招牌高潮眼，非常迷人，睇嚟香香唔喺度，佢特別風騷！
扮演飛虎嘅港男陳志健，好搞鬼咁喺現場飛吻。岑麗香前日拍劇，佢演嘅女飛虎身手一啲都唔輸蝕畀啲男演員。
from:
http://hk.apple.nextmedia.com/entertainment/art/20130322/18203090
