現年48歲嘅郭富城同33歲嘅熊黛林（Lynn）拍拖咁多年，近排傳佢哋敵唔過七年之癢，話城城暗撻比佢年輕19歲嘅苟芸慧。苟姑娘前晚仲同無綫高層樂易玲去睇城城演唱會，城城全晚勁歌熱舞，大唱冧歌，但苟姑娘全程呆坐，冇乜反應，淨係城城唱到同佢結緣嘅廣告歌《天機密語》嗰陣，苟姑娘先揮動手中藍光燈，仲裝出冧樣。
到尾聲嗰陣，城城叫台下歌迷拎手機唱《愛的呼喚》，苟姑娘都好聽話，即時拎出同城城拍廣告時用嘅手機，又開着閃燈營造燈海。苟姑娘噚日接受電話訪問，唔認係城城私下送飛：「有冇畀公司我唔知，其實係樂小姐叫我去。」
苟姑娘好聽話，跟足城城指示攞手機製造浪漫燈海。城城前晚個唱後同小美一齊走。
否認下戰書
苟姑娘話聽《天機密語》特別投入，但就唔認係向熊黛林下戰書，佢話：「其實今次件事都要對Lynn同城城講唔好意思。」樂小姐噚日被問到點解淨係帶苟姑娘睇騷？佢喺電話度話：「唔係，唔好敏感，小美好好，畀飛TVB藝人睇。」
from:
http://hk.apple.nextmedia.com/entertainment/art/20130321/18201912
