柯震東同Angelababy（楊穎）之前合作拍電影《在一起》，日前佢哋咁啱同日去上海，仲喺機場碰到，當佢哋嘅助手去攞行李時，冇見好耐嘅柯震東同Baby走埋一邊慢慢傾，佢哋仲當眾頭貼頭咬晒耳仔，唔知傾乜秘密要挨到咁近呢？
好在佢哋各有另一半，唔怕會傳出緋聞，相信黃曉明同蕭亞軒都唔會呷乾醋，所以Baby同柯震東傾到雞啄唔斷，表現得好大方，而戴黑超嘅Baby成個明星look，反而柯震東就打扮低調，兩個明星企埋一齊，引嚟途人指指點點。
柯震東同Baby喺上海機場偶遇，兩個人好親密咁挨到實咬耳仔傾密偈，唔知講緊乜秘密要咁細聲呢？唔知黃曉明同蕭亞軒會唔會呷醋呢？
Baby零粉絲
之後佢哋助手攞完行李，兩批人齊齊出閘，柯震東有一班粉絲專登嚟接機，仲送咗好多禮物畀偶像㖭，反而Baby就零粉絲迎接，搞到佢有啲尷尬，行快幾步閃人，而柯震東就由粉絲護駕下，浩浩蕩蕩走去停車場，其間仲不停同粉絲玩自拍，十分識做。
柯震東同Baby邊行邊傾老友鬼鬼。柯震東有大班粉絲接機，被冷落嘅Baby好鬼尷尬。
from:
http://hk.apple.nextmedia.com/entertainment/art/20130320/18200798
