每年7月書展檔期，梗有唔少𡃁模出寫真集吸吓班宅男水！不過唔係個個都賺到盆滿缽滿，衞詩雅（用番原名啦，話唔想同連詩雅撞喎！）就諗到不如學以致用，做珠寶出身、又擁有珠寶鑑證文憑嘅佢，決定今年喺書展期間出本書，教吓男士點揀靚珠寶氹女友。
上星期為新書影相，FBI都專登「摃」咗去𥄫吓，衞詩雅話遲啲會為本書戴埋堆名貴珠寶去日本影相，佢話自己以前都試過拎住幾百萬珠寶周圍走，「我以前做過鑽石sales，曾經因為要見客，試過一個人拎住幾百萬鑽石喺街度行，一個保鑣或助手都冇，𠵱家諗番至識驚！」
由於借番嚟嘅晚裝胸位唔係幾啱身，衞詩雅周不時都要用手托實件晚裝，影影吓又要叫停抽番上啲條裙，好彩佢都算心口有啲肉地，托得住冇走光咋！大大間英皇珠寶喺背後撐腰，呢日閒閒哋就借咗幾千萬鑽石出嚟畀衞詩雅影相。
本書係衞詩雅一手一腳包辦，難怪佢對每張相都鬼咁認真，不斷同攝影師研究邊張靚。
