圈中稱得上大美人有三個，林青霞、李嘉欣、關之琳，各有富貴另一半！唔使做，攞正牌做闊太嘅林青霞，上個禮拜五（三月八日）又約埋老友陶敏明，一齊行行街過週末。
喺ifc連卡佛血拼慶祝三八婦女節，青霞鎖定目標，睇郁吓手都幾千銀嘅Rimowa旅行箱，左揀右揀半個鐘，決定要個中size嘅，盛惠六千幾。
一場嚟到，冇理由唔去瞄一瞄今季春裝，不過醒目青霞好快發現《壹》仔跟到實，店員於是安排VIP入去連卡佛入面一個角落位，由專人攞衫俾佢慢慢睇，門口再加埋圍欄同店員看守，保證半張相都影唔到。
血拼完，職員安排送貨，青霞跟陶敏明兩手fing fing，經秘密通道運去四季酒店離開，之後再約多幾位好姊妹去跑馬地Amigo食晚飯。
食嘅著嘅用嘅，青霞唔會待薄自己，不過佢位十五歲大千金邢愛林，就鍾意走平民化路線。食完飯，青霞叫司機開車去中環H&M，原來囡囡响入面揀緊衫，大美人亦投其所好，陪睇一份。咁當然，係齋睇冇幫襯嗰隻啦！
唔好誤會，呢度唔係連卡佛，而係走大眾化價錢嘅H&M，青霞都係為咗陪囡囡睇衫，先入去行咗個圈。
已經十五歲有多，媽咪仲當邢愛林係細路女，親自照顧上車。
Sales落足嘴頭介紹旅行箱，青霞戴番副眼鏡睇真啲內籠設計，搞咗半個鐘先扑槌買。
連卡佛店員安排VIP青霞走入角落位，之後再輪流攞衫入去俾佢慢慢揀，體貼到暈。
血拼完，青霞再約多幾個朋友去跑馬地食晚飯，離開嗰陣手上攞住兩支玫瑰花，外籍職員仲幫大美人開車門。
