商台DJ少爺占（原名甄子康），上月情人節失驚無神於微博自爆與圈外女友Tina（冼燕珍）已秘婚七年。少爺占表面上希望還老婆一個名份，但據知原來占嫂已懷蛇Ｂ兩個月，少爺占呢鋪唔講唔得。
突然做人老竇，一向瓣數多的少爺占不得不努力儲定奶粉錢。下月舉行的talk騷三度加場都爆滿，已令他穩袋百萬酬勞。他毫不客氣說：「我要求公司再分多啲錢俾我呀！」
今年36歲的少爺占，雖然不時被拍得與女友Tina拍拖，但由於他一向低調處理感情，故一班商台同事對他秘婚一事全不知情，甚至懷疑過他是同志一名。
為了谷票房，瘦骨如柴的少爺占作女性打扮箍實兩名肌男開記招宣傳。難怪少爺占曾被誤傳是同志。《蘋果日報》圖片
上月情人節，少爺占於微博自爆與幼稚園同學Tina已經秘婚七年，更特登摷番幼稚園畢業相佐證。
岳母施壓
不過自去年底，少爺占一反常態開始向相熟同事露口風。一名商台員工爆料：「佢無端端自爆爭我哋班同事好多年利是，話遲啲一次過奉還，又向生過BB嘅同事問生仔嘢，咁大家都估到係咩事啦！」
今次少爺占自爆秘婚，全因老婆Tina有餡兩個月。既然仔都有埋，岳父岳母自然向少爺占施壓，逼他認頭。知情人士說：「Tina同阿占（少爺占）喺幼稚園已認識，今年大家都係35歲。為咗保護老公，Tina連同阿占一齊都唔認，搞到佢成日俾班同事催結婚生仔，真係好尷尬。加上Tina嘅媽咪又成日俾啲親戚問長問短，家陣搞大埋個肚，阿占點都要負番啲責任。」
上周三（6日），本刊拍得少爺占商台收工後，便揸車到南華會接老婆Tina返家。只有兩個月身孕的Tina還未見肚，動作依然敏捷。
準時收工
上周三（6日）下午6時多，少爺占做完節目後不久，便離開商台，行去停車場攞車。少爺占於商台屬高薪一族，可以收咪即走，認真疏乎。
寶馬接老婆
少爺占揸住架價值60萬的白色寶馬，到南華會接老婆Tina。一身運動打扮的Tina雖未曾見肚，但腰間有圓潤跡象。
幫老公買糕
之後少爺占將車駛到灣仔，Tina則負責落車幫老公到士多買缽仔糕。懷有2個月身孕的Tina動作依然敏捷。
占：同老婆一齊面對
少爺占與Donald（左一）前年開始與鄭裕玲齊齊開咪，據知《口水多過浪花》是商業二台收聽率之冠。
20歲經已加入商台做DJ的少爺占，近年愈撈愈多瓣，除了一人分身成野仔樂隊和組合I Love You Boyz搞騷出碟𢱑銀外，前年他更踏足潮界開時裝店吸金。下月他又單拖到新光戲院開talk show，由原本五場加至十二場，百萬奶粉錢袋袋平安。
周一（11日），記者致電少爺占，對於老婆懷孕一事，他說：「哎吔！唔好俾咁大壓力我啦！我哋呢個歲數，唔係話生就生㗎！懷孕過程好重要，我想同佢一齊面對，等我完咗個騷先講啦！（會唔會拉老婆上台？）唔會啦！咁樣好唔型。（係咪Tina父母俾壓力要你公開名份？）壓力一定有。你未結婚，屋企人就要你結，結咗婚就要你生仔。（今次talk騷袋咗成百萬喎？）吓！係咩！其實商台都未出糧俾我，我真係唔知實數。不過我依家強烈要求公司加多啲人工同分番多啲騷錢俾我囉！」
12場袋96萬
少爺占今次首度單拖做talk show，show名為《朱艷強口口笑之super me》，令人費解。今次12場talk show由商台主辦，於新光戲院小劇場（戲院2院）舉行，全場座位有430個，票價為350元和250元兩種。單是門票收入已有$177萬，加上棟篤笑製作成本一向較低，而且有puma贊助，扣除租場費和少爺占的96萬酬勞（$8萬×12場），估計商台今次可賺近40萬，雖然數目唔多，但既可催谷DJ人氣又省自己招牌，何樂而不為。
玄學家李居明去年投資千萬將41年歷史的新光戲院翻新，更頻頻搞騷。《蘋果日報》圖片
少爺占talk show雖然12場爆滿，但他竟說：「個show都冇乜賣點，啲稿都未度好！」
𢱑銀路線圖
商台DJ出名百足咁多爪，入行16年的少爺占曾經以多個不同身份吸金，計埋自家品牌和炒樓，千萬身家走唔甩。若然港台員工需要提交「思想路線圖」，咁少爺占就一定有「𢱑銀路線圖」。
●I Love You Boyz
少爺占和Donald（唐劍康）02年組成「I Love You Boyz」，以搞笑出位，二人曾經扮過女人與市民玩遊戲。他們多年來轉過四間唱片公司，推出超過十張唱片，又試過出書兼開騷，估計此牌頭已令少爺占賺200萬。
●野仔
另一邊廂，少爺占與其他三名成員組成樂隊「野仔」，大走rock風。其間他們推出過三張大碟，舉行音樂會亦勁賺30萬。由於收入要一分為四，故少爺占憑「野仔」之朵賺了80萬。
●開舖
少爺占11年與朋友合資開時裝店MeeH，專售日本潮服，兩年來於尖沙嘴、銅鑼灣和沙田開分店。不過近年舖租癲升，即使生意強勁，只為少爺占帶來100萬收入。
●炒樓
自小家住西灣河的少爺占，98年買了鯉景灣第一個單位後，多年來三度於同屋苑買賣，共獲利650萬。現時他仍持有鯉景灣海景大單位，市值1,400萬。
賺約1,030萬
