前排媽咪姐喺條街見到好耐無蒲頭嘅陳奕迅，當日佢親自落街去屈臣氏買日用品，仲好鬼主動同啲街坊點頭微笑。因咩事咁好心情先？媽咪姐收到風，陳奕迅7月嘅演唱會「陳奕迅Eason’s Life演唱會2013」雖未公開賣飛，但內部認購已經爆晒額。家陣佢仲鬼咁頭痕，睇吓可唔可以加多幾場。係就一天都光晒啦，媽咪姐唔使四圍撲，還飛債吖嘛。
Eason演唱會門票內部認購喺3月初已經爭崩頭，所有貴飛靚位已經一張都無剩。今次開12場真係豬籠入水，莫講話行街，Eason發夢都應該識笑。未開始進入練氣階段嘅陳奕迅，行過餐廳麵舖都會望兩眼，睇吓有咩啱食，不過食埋呢個月就要閉關養聲練氣啦！
徐濠縈開心人妻
老公揾到錢，徐濠縈繼續風騷出活動，仲話Eason飛過日本同佢慶生之餘（想知場面有幾sweet，陣間就要睇埋p.26！），又承諾戒煙㖭。
有老公錫，人都特別靚。（設計對白）
