本港近日接連發生兩宗逆子弒父母的倫常慘案，其中一名沉迷打機的疑兇，夢想成為漫畫中的「華英雄」，不甘母親斥責而動殺機。曾在電影《中華英雄》扮華英雄的鄭伊健同樣鍾意打機，他昨坦言對慘案難以接受，覺得好恐怖，自己從沒打機打到想殺人，呼籲大家做任何事都要適可而止。
繼大角嘴揭發弒父母碎屍案20小時內，前日凌晨再發生一宗逆子斬殺父母的慘劇，沉迷打機的疑兇，因跟舊同學連夜打機被母親責罵，盛怒下斬殺父母，事後疑兇聲稱想變成漫畫《中華英雄》內的華英雄，擁有天煞孤星的命格，事件震驚全城。
鄭伊健昨坦言對倫常慘案難以接受，覺得好恐怖。伊健曾在電影《中華英雄》扮華英雄，弒父母的疑兇視華英雄為偶像。
「可能忽略溝通」
曾在電影《中華英雄》扮演華英雄的鄭伊健，昨早跟歐倩怡到海洋公園為國際培幼會的「培您童行」擔任大使，對於接連發生倫常慘案，伊健說：「好難接受，大家要留意新一代點教育，𠵱家啲人好着重做乜學乜，可能忽略溝通，有咁嘅現況好恐怖。」
對於疑兇沉迷打機，同樣愛打機的伊健說：「做乜都要適當，打機都係健康活動。」至於疑兇表示想做華英雄，伊健嘆謂：「只係一本書嚟，我以前都有夢想過，咁好彩我入咗行，拍戲夢想成真，可能佢冇空間表達出嚟，我都好鍾意打機，總之唔好over就得，年代唔同咗，家長思想都要改變吓，我大個咗有思想先可以打機，會控制到自己，第一次買遊戲機係入行喺無綫第一份工。」
問伊健會否打機打到想殺人？他說：「唔會，呢個唔係好嘅社會現象，遊戲有分暴力、益智，父母要監管，生下一代要承擔責任。」問到是否影響他生小朋友？伊健坦言：「我同另一半都冇呢個打算，因為太多憂慮，無論環境、制度、教育，都好有壓力。」
歐倩怡指五歲囝囝未懂打機，將來她會給予正當指引。
倩怡禁兒子打機
另外，歐倩怡帶囝囝出席活動，她表示囝囝現年5歲不懂打機：「我同安仔（郭晉安）唔會畀囝囝接觸智能手機，唔只打機，每一樣太沉迷都會影響生活，自己有宗教信仰可以引導小朋友，如果將來佢打機，會畀正當指引佢，今次事件好複雜，係社會問題。」
from:
http://hk.apple.nextmedia.com/entertainment/art/20130318/18198690
