古明華捱足十多年，憑《巴不得媽媽》蘇基一角彈起，近期人氣急升吸金力強，開始儲到第一桶金。近日，「古佬」效法其他藝人，投資食店，數個月前以六位數字，入股友人的火鍋店，初嘗做老闆滋味。
基層出身的古佬，升呢做「老闆」後，每逢有時間，便到火鍋店打點，由吧枱至廚房都親力親為。咁又係！正如他所說︰「力不到不為財。」
賺到第一桶金的古明華，最近計劃多多，除了投資火鍋店外，更向友人透露想買多層樓收租。「古佬最初冇同人講自己做咗老闆！不過見佢近排好忙，拍《On Call II》時中間有兩、三個鐘break，佢都話有嘢做唔見咗人。問多幾次，佢至肯講話用咗十幾萬入股朋友間食肆，仲話遲啲請成班工作人員上去試菜。佢本來住緊嘅居屋差唔多供滿，依家喺油尖旺搵緊個細單位，準備買嚟收租。」知情者說。
睇地產
雖然時間緊迫，但古佬行過地產舖也停下來望一望樓盤，與友人研究一番，有意入市。
古佬入股的「極品火鍋」位於佐敦吳松街，當地食肆林立，競爭激烈。
驗海鮮
古佬到達火鍋店後，即巡視吧枱，檢驗海鮮、刺身的質素。
巡舖面
趁拍攝《On Call 36小時II》有兩小時的空檔，古佬都要趕往火鍋店打理生意，反而廚房員工仲有時間食晚飯。
拍劇空檔落舖
上周四（28日），古佬於無綫出席完新劇《On Call 36小時II》拜神活動後，約黃昏五時，便揸車到佐敦。其間途經地產舖時，古佬駐足留意樓盤行情。只見他和友人在地產舖門口密斟十分鐘後，然後齊齊上了位於二樓的「極品火鍋」。
當時仍未到飯市，人流較少，眼利的古佬發現記者，他亦承認是老闆之一，更大方任影。他先到吧枱視察海鮮及刺身的新鮮程度，逗留一會便走入廚房。廚房內，古佬首先打開雪櫃檢查食物，又將煲內的食物逐一試味，更埋砧板位學切東西，其後他又返回樓面招呼客人，非常忙碌。古佬合共逗留四十五分鐘就離開，臨走時清潔阿姐仲向他打招呼：「老闆，乜咁早走呀？」古佬說：「係呀，要開工呀！」
自「蘇基」彈起後，古佬工作不斷，除之前的《瘋狂歷史補習社》孭飛外，他亦加入《On Call 36小時II》，與楊怡及馬國明合作。
古佬憑電視劇《巴不得媽媽》中的「蘇基」奪台慶的「最佳男配角」，此後他每個月至少有五個商場騷，月賺最少十多萬元，開始賺到第一桶金。
簽單有限額
他說：「我投資咗六位數字，都係小試牛刀學做生意啫。（幾時入股？）間火鍋店開咗兩年，係我一位好朋友開嘅，我就最近呢幾個月先入股。（廚房你都做埋？）做老闆要係咁，我當學藝，力不到不為財呀！（見你睇樓盤喎！）睇定先，我依家住緊居屋，換樓自住定投資都未決定，總之希望長做長賺啦！」
問到做食肆老闆怕唔怕被朋友屈「簽單」？他說︰「我哋定咗規矩，每個月只可以簽一定數目。如果唔係個個朋友要我簽單，真係唔得掂！」
出位香辣雞鍋
古佬做老闆的「極品火鍋」位於佐敦吳松街，舖面連廚房約有5千呎。記者本周一（4日）直擊其晚市，發現店內的VIP房早已爆滿，大廳內的位置也有六成入座率，以閒日來說生意算是不錯。記者發現不少食客都揀招牌香辣雞鍋做湯底，不過就冇客人知道古佬係老闆之一。
食客彭生（左）及魯生都係熟客，兩人向記者推介手打桂花墨魚丸（$88）及皮蛋餃（$40）。
香辣雞鍋（$128）差不多是必選湯底。店員表示雞件經生炒後才放入煲內，記者食過就覺得入口香，夠惹味。
藝人開食店做生招牌
好多明星都會利用自己做生招牌來賺錢，開食店更成為他們熱選的「副業」。
歐陽震華
01年與陶大宇等友人合資6位數字，在銅鑼灣開餐廳「越華會」，是區內著名消夜場。
喬寶寶
兩年前在尖沙嘴開設海南咖喱飯店「千福大少」，以咖喱牛腩為招牌菜，去年5月在筲箕灣再開分店。
郭少芸
02年在銅鑼灣開西式餐廳「Matchone」，農曆年期間推出的羊肉蘿蔔糕更大賣，可惜因沙士而結業。04年她捲土重來在朗豪坊開「match-too」西餐廳，數年前再開辦「小台北」，去年更在將軍澳開分店。
林子善
去年與友人合資7位數字在大坑開設「龍鳳飯店」，開業一個月已回本，今年1月於灣仔開分店。
