余文樂和吳雨霏（Kary）暗撻三個月，兩人同遊歐洲驚爆「樂雨戀」，Kary被洩密後昨日首度現身活動，春風滿面的她跟從樂仔宗旨低調處理戀情，沒有承認拍拖，但大讚樂仔是好演員，絕對不是花心男，明顯對樂仔嗒晒糖。
樂雨戀上月被網民踢爆同遊歐洲，兩人返港時玩前後腳出閘，雖然樂仔沒有給Kary女友名份，但卻被情侶篋出賣戀情，昨傍晚Kary、薛凱琪、Janice Man及徐濠縈等到灣仔出席品牌Chanel活動，Kary自樂雨戀曝光後首次出席活動，蜜運中的她春風滿臉，明艷照人。
記者指她好sweet，問會否承認戀情？Kary甜笑說：「多謝，一直私人嘢低調處理，放完假好開心，𠵱家都好開心，順其自然。」對於歐遊返港當晚跟樂仔分開出閘，Kary解釋：「因為要低調處理，自己都有啲嚇親。」問是否跟樂仔有共識？她說：「佢入行咁多年一直低調，自己都好低調，希望大家明白。」
吳雨霏（右）同薛凱琪出席Chanel活動，Kary好甜蜜咁讚樂仔是好演員，還力撐他唔係花心男㖭。蜜運中的吳雨霏春風滿臉，她甜笑謂要低調處理感情，跟樂仔同一口徑。
Janice Man以一身潮人look出席活動。阿徐透露老公陳奕迅承諾戒煙作為送給她的生日禮物。
唔信樂仔花心
提到樂仔時Kary從心裏笑出來，問是否可寫樂仔是男友？她卻撒嬌謂唔知，記者笑她不夠大方，Kary無奈說：「每個人處理唔同，畀空間我哋慢慢發展。」對於蘇永康都叫她大方承認，Kary說：「佢叫我順其自然，我冇否認。」問樂仔是否好仔？她冧爆讚：「佢係好好演員，好識照顧身邊人。」至於有傳樂仔曾追求鄧麗欣（Stephy），令兩姐妹現在反目，Kary否認：「好笑，梗係冇，姐妹梗係希望對方開心。」還為男友澄清花心傳言：「佢以前嘅嘢我唔清楚，但唔信佢係咁嘅人。」
另徐濠縈日前在日本度過39歲生日，老公陳奕迅（Eason）秘密人肉速遞炮製驚喜，她說：「我都估到，因為朋友話上次巴黎咁遠佢都嚟，何況今次東京，真係好開心。」問Eason送了甚麼生日禮物？阿徐說：「佢話戒煙，係一個承諾嘅生日禮物。」
from:
http://hk.apple.nextmedia.com/entertainment/art/20130313/18193115
