無綫新劇《神槍狙擊2013》上個禮拜三（二月二十七日）舉行拜神儀式，劇中兩啤男女主角，徐子珊搭謝天華，張兆輝加好耐冇返香港拍劇嘅周海媚。
男飛虎要著窄身短袖T谷胸肌，香香就著小背心露手臂，監製呢個安排，果然為宅男設想。
張兆輝（左）劇中艷福都唔差，同周海媚徐子珊會有感情線，佢話收到風香香多人爭，講笑話自己兩個夠晒數，香香留俾班後生！
雙生雙旦坐鎮，不過加埋都唔及香香公主岑麗香一個搶鏡，佢响劇中雖然係女飛虎，但唔使著避彈衣嗰陣，就背心仔加軍佬褲襯黑長boots，幾好睇呀！
宅男見到流口水，同香香一齊扮飛虎班男藝員，聽講個個餓狼上身，輪流向佢獻殷勤，疑似嗒糖人物，包括來自樂壇組合Boyz嘅Steven張致恒，港男代表有溫家偉、翟威廉，以及舊年同羅樂林囡囡羅苡之結咗婚嘅陳志健，就連之前响《On Call 36小時》飾演馬國明細佬「張一康」嘅新人魏焌皓，同樣拜倒香香裙下。
萬千寵愛，香香話個個都對佢好好，教佢中文又教做體能運動，唯一唔好，係成班男人有陣時會圍埋講鹹濕笑話，香香話好在自己中文差，聽唔明，好幸福喎。Well，如果內容講緊你，你又聽唔明，咁就弊啦！
周海媚難得返香港拍劇，久違拜神燒豬，邊食邊攞一大袋走，張兆輝就攞住兩大碟客串做侍應。
