台灣女子組合S.H.E成員Selina，自兩年幾前喺上海拍劇集《我和春天有個約會》遇爆炸意外搞到身體54%面積被嚴重灼傷後，一直停工做復健，前年仲嫁咗畀男友張承中做人妻，舊年Selina終於復工出席活動，馮仁昭收到風，S.H.E會喺今年10月嚟紅館開騷。
S.H.E今年10月再嚟紅館開騷，09年佢哋曾喺紅館大騷美腿。Selina當年拍爆破戲搞到身體被嚴重灼傷，但佢好堅強接受復健。
暫唱一場
S.H.E舊年10月推出新碟後，反應好好，歌迷都好掛住Selina、Hebe同Ella合體演出，據知，S.H.E將會喺6月舉行巡唱，不過由於Selina傷後體力有限，大家都唔想佢咁操勞，所以唔會去好多地方巡唱，好在香港被揀中係其中一站，暫定10月中喺紅館唱一場。
其實嚟緊好多台灣幫排隊嚟紅館開騷，好似年年5月都嚟香港開騷嘅五月天，仲有周杰倫都攞咗期，至於飛輪海成員炎亞綸單飛後，7月都嚟港開騷，不過場地唔係紅館，而係九龍灣Star Hall。
from:
http://hk.apple.nextmedia.com/entertainment/art/20130306/18185550
