吳國敬為不少圈中歌手寫下金曲而結下音樂緣，他將一連四星期請來四位圈中好友大爆那些年往事。頭炮是與阿敬即將Rock上舞台的鄧建明（Joey Tang），多年來他們留着一把招牌長髮，阿敬原來曾向Joey教路「髮」術，並幫對方溫馨吹頭髮，可謂男人的浪漫。兩位長髮型男人到中年，自爆開始出現脫髮危機，兩人20年的兄弟情亦曾一樣遇上危機，幸好最終一酒泯千仇。阿敬經Joey多次「逼婚」後，預告明年迎娶女友！
吳國敬（左）與鄧建明兄弟情超過20年，期間一起經歷過不少趣事。
結「髮」兄弟
敬：記得第一次喺電台記招見你，你當時已留緊長頭髮，着住窄腳褲，仲成面暗瘡。
鄧：我以前係好似你咁嘅髮型，帶金絲眼鏡、好瘦。你嗰時成日話我啲頭髮好旱，不過諗番起吹頭事件真係好感人。
吳國敬與鄧建明即將一起開騷，二人將在台上大jam搖滾歌曲。
吳國敬與鄧建明多年前曾經一起開騷。
鄧建明的一頭長髮keep住多年。
敬：你啱啱嗰時開始留長頭髮，咁你不嬲都唔識吹頭o架嘛，你有次吹完頭上嚟我屋企，哇，吹到成個師奶咁！我留開長髮識吹，咁我咪幫你再吹頭髮，但發現我嘅吹頭方法都唔係啱每個人用。
鄧建明原來曾經搞喊外表硬淨的吳國敬。
麟李早前開騷大受歡迎。
鄧：係囉，搞到我即刻要再去洗頭啦，其實我留長髮係因為Paco（黃柏高），佢有次無端端捉我去唱隻歌，話要我留長頭髮，同埋整一執白色Highlight，開始咗之後，就發現長頭髮好舒服。中途都剪短過，剪完之後心知大鑊，嗰半年簡直生不如死。
敬：不過我哋都出現咗中年脫髮危機，唔緊要啦，留得幾耐得幾耐。我哋嚟緊開騷都唔會特登轉形象啦，我哋不嬲都唔係玩時裝、玩形象，好多人問會唔會換衫？會呀，唱到濕晒當然要換啦！
鄧：但我哋都會減肥操肌，你鍾意玩獨木舟，我三年前開始愛上打拳，發現唱歌練氣都好咗。
敬：總知到時操到有肌肉就騷，冇就收埋，我諗都唔會太差嘅，我哋兩個都唔算肥。
風雨同「露」
敬：仲記得有一次，你打畀我話「阿敬，你有無試過坐開篷車呀？」我話「未呀」，你就揸咗架白色露天開篷車嚟，開住個篷叫我去遊車河。上車嗰剎那真係好型，嗰時我哋兩個出街都有人認得，我哋着到Rock仔咁，好招積！
鄧：我記得，結果去到窩打老道，落大雨吖嘛，我哋仲大叫「閂篷，閂篷」！
敬：結果架車停咗喺維景酒店門口打算閂篷，點知我哋都唔識閂，仲好用力咁「砰砰砰」閂篷，哎吔！啪一聲就爛咗，當時仲要成身濕晒，好尷尬！
鄧：架車其實唔係我o架，係問以前嘅一個監製借，話時話，點解整爛咗架車，你冇夾份賠嘅？
敬：兄弟冇計啦，哈哈！其實我哋兩個同BIG FOUR四個都係由80年代識到依家，經常互做嘉賓，今次我哋開騷都唔例外，見住佢哋成家立室，但都好重友情。
鄧：咁幾時到你結婚先？
敬：我2014年就應該會結婚，個個都話蛇年唔好結，因為自己屬蛇，本命年。
鄧：咁會唔會生番個Ｂ先？
敬：我其實都想生Ｂ，但我老婆（女友Elaine）扭扭擰擰，不過到時係要生就要生o架啦。你成日叫我生啦生啦，你依家真係幾幸福，又父子檔打鼓。
開火冷戰
鄧：不過你記唔記得兩年前試過唔睬我，你原本接咗個騷做策劃，本身係我做開Band Leader，你唔覺意搵咗我拍檔唐奕聰（Gary）去做，又冇預我份。
敬：你當時喺電話好勞氣，雙方開始有啲火，之後仲冷戰咗成兩個月。
鄧：我仲搞到你喊添！咁真係好尷尬嘛，你搵嗰個仲係我老友兼隊友嚟，你點先？阿敬，我好辛苦o架喎，雖然唔係話斷財路，只係唔明點解會換咗人？
敬：當時Gary咁啱喺我隔籬，我就搵咗佢做Band Leader，我真係唔知原本一直係你做開o架，直到你打畀我先知。
鄧：我冷戰兩個月期間，都想快啲冇事，覺得成件事唔應該變成咁，個心好唔舒服，有少少後悔。
敬：好彩經過一位朋友搭路做和事老後，大家一見面就冇嘢啦，仲叫「飲啦兄弟」！之後去咗美國旅行後，我哋兩兄弟咪又繼續盡訴心中情。
誓做Band版「麟李」
吳國敬與鄧建明兩兄弟齊齊拍住上，將在四月舉行演唱會，兩人的合作早在6年前已被投資者睇中，他們稱：「大約6、7年前，我哋喺酒吧合作做一個騷，個老闆當年睇過演出，到佢大個咗就想投資呢件事。」他們更笑言要做「Band版左麟右李」：「香港興Crossover嘛！我哋就好似Band Sound版嘅左麟右李，我哋夾就夾得多，都未試過上舞台。」兩子又透露會互唱對方的金曲，更會將慢歌改編成Rock版本，又賣關子說：「暫時邀請咗好多嘉賓，預咗會超時，歌迷千祈唔好遲到。」
From:
http://orientaldaily.on.c ... /00282_050.html
