下月七日（農曆正月廿六日）是一年一度觀音開庫，不少市民及明星善信，都會在前一晚子時（晚上十一時）前，到紅磡觀音廟及筲箕灣天后廟門外排長龍借庫；而位於銅鑼灣大坑的蓮花宮，同樣是借庫熱點之一。上週四（二十一日）未到觀音開庫，周海媚及高海寧已率先到蓮花宮拜神祈福。
有指在國內拍劇收十四萬人仔一集的周海媚，當日只係攞落地有聲的散銀接財神，而近年工作量急升的高海寧仲慳，廿蚊利是添香油，拜神講心唔講金。
拜神笑晒
四十六歲的周海媚，跟廿六歲的高海寧大纜都扯唔埋，二人卻同日（二十一日）下午，不約而同到位於大坑，有過百年歷史的蓮花宮拜觀音。生肖屬馬的海味，與友人結伴到場，有指蛇年利馬，尤其財運方面，只見海味拜完神，笑晒口同朋友一起離開。
在蓮花宮外，有不少向善信派「財神」的公公婆婆駐紮，見有明星立即一擁而上，口中唸唸有詞說「接過財神今年添丁又發財」，希望善信可以更慷慨。財神送上門，海味來者不拒，從手袋內摷幾蚊散銀接財神。
高Ling與母親在後堂外，攞利是封封廿蚊香油錢。
接到多張「財神」，海味笑晒放入手袋。海味與友人步出，「財神黨」（左）初時未有發覺，後來知道有明星客仔，個個爭住向她派「財神」。
避財神黨
至於高Ling，去年事業大豐收，在劇集《法網狙擊》的強姦戲，以及《天梯》做陳山聰三太太角色備受讚賞，人氣收入皆升，每年都有借庫的高Ling，趁得閒帶埋媽咪到蓮花宮還神。
拜完神，高Ling兩母女走出廟外，準備利是封添香油。出名慳家的高Ling，連香油錢都慳，阿媽攞住張十蚊紙，高Ling攞廿蚊，講心唔講金。
去慣去熟，兩母女添完香油，選擇由入口離開，順利避過公公婆婆們的「財神黨」，又慳多筆！
高Ling飲住橙汁入廟，據知年尾已在紅磡觀音廟還過神的她，當日陪阿媽再到蓮花宮一齊祈福。去年在《天梯》（上圖）及《法網狙擊》演出備受讚賞，連帶工作及收入增加，但拜神卻慳住拜。
添完香油，高Ling母女在入口處走人，成功避開企在門口的「財神黨」。四十六歲保養得宜的「小芙蓉」海味，與男友長居北京，近日她返港拍無綫新劇《神槍狙擊2013》，順道到蓮花宮拜神。
明星善信多
大坑蓮花宮建於1864年同治年代，極具歷史價值，被政府評為一級歷史建築。廟宇外形似觀音腳下的蓮花，廟內有龍鳳飛騰壁畫，手工精細。逢觀音開庫善信都會排晒長龍，今年借庫上限為八億，借庫者年尾要還庫，而每年中秋，蓮花宮外更有大型「舞火龍」活動。
蓮花宮借庫明星捧場客眾多，包括鄺美雲、劉德華、杜汶澤、田蕊妮、彭浩翔、袁潔瑩、羅明珠、林家棟、鄧健泓及歐倩怡等。
信佛多年的鄺美雲，據知每年都會在蓮花宮添巨額香油錢。
