去年朱慧敏拍《愛•回家》擺款扮阿姐，引來無綫製作部總監曾勵珍正視，將她由女主角燉做閒角施以懲戒；早前劇組再就劇中核心演員林漪娸，以及長拍處境劇的趙永洪態度差開大會。據悉二人跟朱慧敏一樣，衰擺款！但林漪娸被照肺照駁嘴。反而扮死狗認錯的趙永洪就無得留低，要被叮走！
擺到明，大細超！
被鬧到眼濕濕
《愛•回家》收視理想，作為劇中核心人物的林漪娸，卻恃住有高層曾勵珍撐腰，經常要求PA改rundown遷就自己的時間，更試過一個rundown為她改了八次有多，負責的PA忍唔住，不時跟林漪娸有拗撬。事件驚動製作部，「揸正嚟做」的珍姐，為免授人包庇心腹話柄，早前的檢討會中，首先發聲公審林漪娸。「你（指稱漪娸）估你係製作部，有權話事改rundown㗎咩！rundown安排你點拍就點拍！」
有指林漪娸於事前已得到老友打定底，知道要做大龍鳳，但當場被剷爆的她，仍忍唔住駁嘴反擊。見對方撐到「行」，珍姐即時着燈，再加多幾分火力鬧爆，直至將林漪娸鬧到眼濕濕，頭耷耷才罷休。
做咗6年處境劇膽，趙永洪終因與珍姐愛將導演Gary嘈交而被擲入雪櫃。
《愛》劇演員感情要好，故眾人都為趙永洪罰停感不值。
由當年《真情》、《皆大歡喜》到《愛》劇，珍姐都愛用心腹林漪娸，去年她倆孖住馬海倫行街，私交甚篤！
改rundown
林漪娸因經常改rundown被照肺。但之後獲珍姐氹番，加戲給她。而得珍姐痛錫的徐榮，將被力捧做男主角。
扮鵪鶉認錯
拒試位
有指趙永洪擺款，不肯為冇對白的場口埋位試機，俾導演篤背脊，惹怒珍姐。
先被照肺的林漪娸辣㷫珍姐把火，接住輪到同樣衰擺款的趙永洪，他選擇做鵪鶉，任噴！
「認錯都冇用，佢得罪嘅係珍姐愛將！有次PA叫佢（趙永洪）同其他演員試機（排戲），話自己冇對白，唔使咁快埋位，要去食個早餐，叫個PA正式roll機先好叫佢埋位。當日負責拍嘅係早排拍《心路GPS》，將劉萱蔚個頭冚埋牆嗰個躁狂導演Gary，佢一聽見趙永洪話正式roll機先埋位，即時開咪鬧，趙永洪仲唔識死，企硬同珍姐個愛將開拖嘈。公審當日佢都知咩事，加上見珍姐晨早俾林漪娸激到上晒頭，所以都扮晒死狗認錯。」知情者說。
兩人同犯擺款罪，但夠薑撐到「行」的林漪娸，竟獲珍姐包涵，不似去年的朱慧敏判罰減戲，反獲加戲份。至於做鵪鶉的趙永洪，卻被嚴懲！原本在戲中跟黃子雄拗緊手瓜追姚瑩瑩的他，忽然轉為炒輸孖展，黯然離港，被叮出《愛•回家》。
「珍姐同林漪娸friend到爆，鬧林漪娸只係場大龍鳳，向製作部班手足做交代；但轉個頭就開多條線俾林漪娸啦。趙永洪就冇得留低，本來劇情發展係講佢同蔣志光搞公司做老闆，等佢跟有錢婆姚瑩瑩拉近距離，但而家要叮佢走，所以轉變成同老死徐榮反面，仲要炒輸孖展咁走人。其實大家都唔捨得佢，希望等珍姐過咗啖氣，有得解凍啦。」知情者續說。
朱慧敏翻生
至於因為扮阿姐，教導演拍戲被燉變閒角的朱慧敏，早前獲珍姐稱許「守行為」期間表現良好，將可起死回生重做女主角。
「珍姐讚佢有進步，所以嚟緊會照番原有嘅構思，同男主角黎諾懿發展感情線。」劇中工作人員說。
劇集加碼至五百集（預計拍到明年底），被珍姐重判的趙永洪，安排在《愛》劇二百多集提早消失，但他否認是被叮出局。「劇情講我去上海發展，會唔見一排啫！之後可能有伏線安排我出現番。」趙永洪說。
當日檢討會，曾因扮大牌遭珍姐打柴的朱慧敏獲讚，指她「守行為」期間表現良好，故將升回女主角，並可在劇裡與男主角黎諾懿展開情緣，與朱璇爭仔。
處境劇台柱
藝訓班出身的趙永洪，自07年在處境劇《同事三分親》跑出，六年來如台柱，連接拍處境劇。
08年《畢打自己人》
10年《天天天晴》
11年《誰家灶頭無煙火》
篤趙永洪背脊，有躁爆導演之稱的Gary，是珍姐愛將。縱然跟不少藝人有牙齒印，去年他拍《心路GPS》，用膠袋笠劉萱蔚頭的暴躁場面被人偷拍公開，但仍得珍姐護航。
