上個禮拜四（二月二十一日），Angelababy以大使身份，到澳門出席第一千場《水舞間》演出，當日有份嚟睇騷嘅一對情侶，男友上台當眾向女友跪地求婚，Baby幫手做見證，又話咁嘅場面，係女仔都唔say no！換轉係佢自己呢？Baby就唱反調話工作行先，一定拒絕喎！
啱啱過咗嘅情人節，黃曉明响北京帶傷開工，Baby就去咗紐約做嘢，聽講海綿蛋糕越洋送花，浪漫招數盡出，差在冇得見面。分隔兩地，但Baby一直戴住男友送俾佢嘅卡地亞手鈪，咁恩愛，真係唔想嫁？信一半好啦！
Baby出席《水舞間》活動，一直戴住由黃曉明送俾佢嘅卡地亞手鈪（紅圈），聽講男方都有一隻在手。男觀眾台上向女友求婚，Baby充當見證人。
留响北京帶傷開工嘅黃曉明（箭嘴），情人節前夕約埋北京電影學院嘅老師以及同學敍舊，第二日仲越洋送花俾身在紐約嘅Baby。
