周杰倫前晚由成大班人護駕喺尖沙嘴出巡，加埋佢咁搶眼嘅打扮，係人都認得佢啦，但周杰倫竟然以為掩住個嘴就冇人認得出，真係有少少儍囉！
前日元宵係中國嘅情人節，不過台灣歌手周杰倫（Jay）就撇低女朋友昆凌，帶埋媽咪嚟香港出席佢新碟《12新作》嘅簽唱會。5點幾周杰倫去完記者會，由保安安排之下避開fans上咗架七人車。不過佢哋冇即刻返酒店，成車人去咗自由行雲集嘅尖沙嘴出巡，不過架七人車司機就賽車手上身，見到有傳謀車追訪，唔止高速行駛仲不時非法U-turn。最後都係撇唔甩記者，架車就駛咗去漢口道糖朝醫肚。一向憎狗仔隊的周杰倫，嚟到香港成個人唔同晒，居然出奇友善對住鏡頭揮手打招呼。
有求必應
食到8點幾周杰倫一行人上返架烈火七人車離開，去咗附近廣東道新港中心，人有三急去完廁所之後，就行咗去I.T時裝店睇西裝褸，睇完一間未夠喉仲穿過天橋行過對面海港城另一間I.T繼續睇褸。之後再行到海運連卡佛試了一件迷彩西裝褸後，不過都係冇收穫。雖然周杰倫全程戴住黑超，仲搵手遮住塊面，不過沿途都畀fans認出要求合照，佢都係來者不拒。前後行足個幾鐘，一直到晚上10點幾，至坐返架七人車返去W酒店休息。
採訪、攝影：朱志聰、李志明、吳耀輝
from:
http://hk.apple.nextmedia ... 130226/18177030
