朱咪咪7字馬金剛救駕

58歲的朱咪咪前晚第三次踏足紅館開騷，雖然沒有勁歌熱舞，但她在台上施展「7」字馬，技驚四座，還要金剛上台救駕。咪咪即場演繹容祖兒的《我的驕傲》，更刻意扮祖兒唞大氣，揶揄當今歌手唱歌唔夠氣。
朱咪咪前晚在紅館舉行「大吉利是演唱會2013」，她曾透露與澳門猛人「崩牙駒」尹國駒相熟，每次演出崩牙駒母親定必捧場，但前晚卻未見駒媽蹤影，反而前特首董建華太太董趙洪娉有到場欣賞，全場爆滿。
朱咪咪的生鬼性格令現場氣氛高漲，她率領兩條幼獅出場，不停伸手收利是，並笑說：「放手啦，你阻住我攞利是呀，新年摸我做乜，摸獅頭嘛！」但當有人送花時，她即大嗌：「咪話折現囉。」後來知道是董太所送，即尷尬說：「哦，咁多謝多謝！」

【今日我至重】朱咪咪成功擘出「7」字馬都好厲害，但係擘完就起唔到身，要搵金剛幫手用力抱起佢，搞到露出三吋事業線，非常重口味。朱咪咪落台狂收利是，但還笑歌迷太熱情不停摸她手仔。

寸祖兒唔夠氣
朱咪咪獻唱多首經典金曲及與謝雪心合唱粵曲，當唱到容祖兒《我的驕傲》時，她刻意學祖兒唞大氣，她寸完又讚說：「真係唔慣咁唞氣，咁唞乾到喉嚨脫水，但我都佩服佢哋，唱到咁都咁好聽。」之後又邀請台下的老翁合唱，她說：「我雖然係馬拉雞（新加坡人）嚟香港三十年，見到釣魚台單新聞都把幾火，要唱番首《勇敢的中國人》，等我搵個八十後，係八十歲後嘅人一齊唱。」可惜老翁歌藝勁差，被她取笑是百世難求無音質的奇才。

朱咪咪第三次在紅館開騷，造型很有八十年代懷舊味道。朱咪咪邀請八十歲後老翁（左）上台合唱，但卻被朱咪咪取笑是百世難求的無音質奇才。

《烏蠅的啫啫》
古明華和金剛擔任特別嘉賓，朱咪咪在《巴不得媽媽》演蘇基古明華母親，咪咪笑說：「你老母我呀！」引得全場發笑。朱咪咪還即場表演似足「7」字的一字馬，結果要金剛上台「救駕」扶起她，二人大講有味笑話，朱咪咪問金剛怎樣來香港，金剛說：「打（搭）飛機嚟。」之後又用諧音說：「今日我哋合唱《烏蠅的啫啫》，係《無言的結局》廣東話諧音。」朱咪咪還要求金剛將所得利是分一半回佣，笑說：「唔畀就閹咗你。」
from:http://hk.apple.nextmedia.com/entertainment/art/20130225/18175666

朱咪咪一連兩場的「朱咪咪大吉利是演唱會2013」前晚假紅館正式開鑼，咪咪姐在兩隻醒獅護駕下「打鑼打鼓」出場。雖然前晚已是農曆年十四，但當咪咪姐行近觀眾席和歌迷握手時，一眾歌迷粉絲依然識做地向她猛塞利是，收利是收到手軟的咪咪姐甚至一度停唱，專注「搵外快」，場面搞笑！

咪咪姐華麗登場，落力演出。咪咪姐玩一字馬失手大嗌叫人扶，幸得金剛現身救駕。

盪胸扮奶媽
當晚咪咪姐請來多位嘉賓助陣，其中古明華再度「蘇基」上身，更和朱咪咪在台上上演「母子重逢」，在《巴不得媽媽》飾演蘇基媽媽的咪咪姐一見「兒子」就多次笑言：「你老母我呀！」令全場觀眾笑爆咀。

期後咪咪姐向高難度挑戰，在台上「腿張開」大玩一字馬，但年近60歲的咪咪姐卻老貓燒鬚，施展完一字馬後一坐不起，要大嗌：「邊個扶我呀？」結果由另一嘉賓金剛救駕攙扶。金剛出盡吃奶的力「抽」起咪咪姐後，問她：「你便急呀？」咪咪反擊說：「我係忽必裂呀！」金剛又用唔鹹唔淡廣東話大講有味笑話：「今日我哋合唱《烏蠅的啫啫》（註：普通話《無言的結局》）。」最後咪咪姐又和謝雪心合唱粵曲，謝雪心稱會在新劇扮演奶媽一角，咪咪姐聞言即大放笑彈：「你同我爭飯碗？等我教你做奶媽！」說罷即表演盪胸，認真爆笑！

古明華「蘇基」上身撐媽咪。歌迷向咪咪姐猛塞利是。
from:http://orientaldaily.on.cc/cnt/e ...0225/00282_051.html